13 октябр Раиси вилояти Суғд Раҷаббой Аҳмадзода ба ноҳияи Айнӣ ташриф оварда, бо рафти корҳои сохтмонии муассисаи таҳсилоти миёнаи умумии рақами 48 шинос гардид.

Бино ба иттилои масъулин бинои муассисаи таҳсилоти миёнаи умумии  №48-уми деҳаи Каздони деҳоти Шамтучи ноҳияи Айнӣ барои 320 хонанда дар як баст пешбинӣ гардидааст. Лоиҳаи иншоот аз тарафи КФ КВД “Лоиҳакаш”-и ноҳияи Айнӣ таҳия гардида, тибқи харҷнома барои бунёди мактаб 6,4 миллион сомонӣ равона хоҳад шуд.

12 октябр Раиси вилояти Суғд Раҷаббой Аҳмадзода дар ноҳияи Мастчоҳ аз корхонаи ресандагии  “Арвис Зелал Текстайл”, собиқ корхонаи “Олим-Текстайл" боздид намуда, бо васлу насби таҷҳизот ва таҷдиду навсозии хатҳои технологии корхона шинос гардид.

Корхонаи мазкур бо ташаббуси соҳибкорони тоҷику турк ба кор андохта мешавад ва айни замон корҳои омодагӣ ва таҷдиду навсозии таҷҳизот ҷараён дошта, рӯзҳои наздик ба кор шуруъ карда, ҳамзамон фаъолияти худро дар се баст ба роҳ мемонад.

Дар ноҳияи Мастчоҳ, ки аз навоҳии пахтакори вилояти Суғд аст, ҷамъоварии ҳосил идома дошта, то имрӯз 17000 тонна "тиллои сафед" ба хирман супорида шудааст. Дар ин бора зимни шиносоии Раиси вилояти Суғд Раҷаббой Аҳмадзода бо ҷамъоварии ҳосил дар хоҷагии деҳқонии "Лангар" иттилоъ дода шуд.

Тибқи нақша имсол дар ноҳияи Мастчоҳ 28980 тонна пахта истеҳсол карда мешавад ва ҳамарӯза то 615 тонна пахта ҷамъоварӣ шуда истодааст. Хоҷагии деҳқонии "Лангар" дорои 48,8 гектар замин буда, деҳқонон дар 40 гектари он парвариши пахтаро ба роҳ мондаанд. Аҳли заҳмати хоҷагӣ то ҳоло 100 тонна пахтаро ба корхонаҳои коркард супорида, тасмим доранд, ки рӯзҳои наздик нақшаи истеҳсолро иҷро намоянд. 40 нафар саҳмдорону чинакчиён дар саҳро машғули кор ҳастанд.

Раиси вилояти Суғд Раҷаббой Аҳмадзода дар хоҷагии деҳқонии ба номи "Ашӯрзода"-и ноҳияи Мастчоҳ бо ҷамъоварии ҳосили чормағзи заминӣ шинос шуд.

Бояд гуфт, ки имрӯзҳо дар ноҳияи Мастчоҳ ҷамъоварии ҳосили зироат, аз ҷумла чормағзи заминӣ ҷараён дошта, кишоварзони ноҳия ҳосили хуб ба даст меоранд. 

Чормағзи замини яке аз зироатҳои пурқиммати равғандор буда, дар ноҳияи Мастчоҳ парвариши он зиёд ба роҳ монда мешавад. 

12 октябр Раиси вилояти Суғд Раҷаббой Аҳмадзода ҷиҳати шиносоӣ бо ҷараёни корҳои ободонию созандагӣ ва рафти корҳои саҳроӣ, аз ҷумла ҷамъоварии пахта ва коркарди он ба ноҳияи Мастчоҳ сафари корӣ анҷом дод.

Дар доираи сафар роҳбари вилоят бо фаъолияти корхонаи коркарди пахтаи  ҶДММ «Музаффар компания» шинос шуд. Тавре иттилоъ дода шуд, корхонаи коркарди пахтаи «Музаффар компания»  то кунун зиёда аз 2500 тонна пахта қабул намуда, беш аз 2000 тоннаи онро мавриди коркарди аввалия қарор додаст. Ин корхона соли ҷорӣ бо 230 хоҷагии деҳқонии ноҳия шартнома ба имзо расонида, дар вақти кишту кор кишоварзонро дастгирӣ намудааст. Зимни шиносоӣ ба роҳбари вилоят иттилоъ дода шуда, ки истифодаи тухмии хушсифат боиси фаровонҳосилӣ гаштаву ҳамзамон барориши нах то 36-37 дарсад  буда, 59 дарсад чигит истеҳсол гашта истодааст. Дар ин корхона 36 нафар фаъолият доранд.

10 октябр Раиси вилояти Суғд Раҷаббой Аҳмадзода дар ноҳияи Бобоҷон Ғафуров бо рафти ҷамъоварии пахта шинос шуд.

Раиси вилоят аз ҷумла дар хоҷагии деҳқонии ба номи Бобо Мақсуд вазъи чиниши пахтаро мавриди таваҷҷуҳ қарор дода, дар ҷамъоварии ҳосил саҳм гузошт ва ба чинакчиёни пешқадам туҳфаҳои хотиравӣ супорид.