Аёдати собиқадорони меҳнат дар ноҳияи Спитамен

Нимаи дуюми рӯзи 21 декабр Раиси вилояти Суғд Раҷаббой Аҳмадзода дар ноҳияи Спитамен собиқадорони меҳнатро аёдат кард.

Раиси вилоят нахуст ба манзили сокини ҷамоати Истиқлоли ноҳия омада, аз ҳоли собиқадори соҳаи тандурустӣ Ҳасанбой Каримов хабар гирифт. Тавре иттилоъ дода шуд, Ҳасанбой Каримов солҳои зиёд барои ҳифзи солимии ҷомеа заҳмат кашида, 20 сол дар вазифаи сардухтур фаъолият бурдааст.

Боздиди Раиси вилоят аз гармхонаҳои сокинон дар ноҳияҳои Спитамену Ҷаббор Расулов

21 декабр Раиси вилояти Суғд Раҷаббой Аҳмадзода дар ноҳияҳои Спитамену Ҷаббор Расулов бо фаъолияти гармхонаҳо шинос гардид. 

Дар ноҳияҳои Спитамену Ҷаббор Расулов ташкили гармхонаҳои хурд дар заминҳои наздиҳавлигӣ маъмул буда, сокинони меҳнатқарини ин ноҳияҳо дар ҳавлӣ ва заминҳои наздиҳавлигии худ теъдоди зиёди гармхонаҳоро ташкил намуда, ҳосили хуб ба даст меоранд. Кишоварзони чашмикордони ноҳияҳо дастуру ҳидоятҳои Пешвои миллат муҳтарам Эмомалӣ Раҳмонро сармашқи кор қарор дода, аз гармхонаҳо то 3-4 ҳосил мерӯёнанд.

Аёдати собиқадорони меҳнат дар Истаравшан

Дар доираи сафари корӣ ба шаҳри Истаравшан Раиси вилояти Суғд Раҷаббой Аҳмадзода собиқадорони меҳнатро аёдат кард.

Раиси вилоят аз ҳоли Хидиров Мелис, Қушқорова Субҳия ва Фотима Шарипова хабар гирифта, ба собиқадорон кӯмакҳои моддӣ расонид.

Хидиров Мелис соли 1935 таваллуд шуда, пас аз хатми мактаби миёна соли 1954 ба инситути тиббии шаҳри Душанбе дохил мешавад. Ӯ солҳои зиёд дар соҳаи тандурустии шаҳр кор карда, хизматҳояш бо ифтихорномаву сипосномаҳо қадр шудааст.

Дар Истаравшан миқдори зарурии пиёз захира шудааст

Раиси вилояти Суғд Раҷаббой Аҳмадзода дар доираи сафари корӣ ба шаҳри Истаравшан дар деҳаи Ругунд аз манзили истиқоматии Аваз Хидиров боздид ба амал овард.

Ин сокини шаҳри Истаравшан ҷиҳати таъмини иҷрои дастуру ҳидоятҳои Пешвои миллат муҳтарам Эмомалӣ Раҳмон барои дар сатҳи баланд гузаронидани зимистон маҳсулоти заруриро захира намуда, бо боварӣ изҳор медорад, ки маводи озуқавории изофиро ба бозор низ ба фурӯш мегузорад. Аҳли оилаи Хидировҳо аҳлона меҳнат намуда, 1000 дона харбуза, 1000 дона каду, 20 тонна ангур барои мавиз, 500 кг мавиз, 50 тонна пиёз захира кардаанд. Пиёзи захирашударо аҳли оила кам-кам ба фурӯш гузошта, аз пули он маводи барои рӯзгор зарурии худро харидорӣ менамоянд.

Дар Истаравшан корхонаҳои нави саноатӣ бунёд карда мешавад

19 декабр Раиси вилояти Суғд Раҷаббой Аҳмадзода дар шаҳри Истаравшан бо рафти бунёди корхонаҳои саноатӣ шинос шуд.

Чуноне иттилоъ дода шуд, бо мақсади саҳм гузоштан дар амалӣ шудани ҳадафи чоруми миллӣ — саноатикунонии босуръати мамлакат дар шаҳр тадбирҳои муҳим амалӣ гардида, бунёди корхонаҳо идома дорад. Яке аз чунин корхонаҳо корхонаи истеҳсоли телевизор, мошинаи ҷомашӯӣ ва дигар таҷҳизоти техникӣ бо бренди «ORVIGA» аст, ки аз ҷониби соҳибкор Ғанӣ Файзиев бунёд гардида истодааст. Аснои шиносоӣ таъкид карда шуд, ки корхона аз ҷониби ҶДММ «ORVIGA» дар масоҳати зиёда аз 2 гектар бунёд гардида, дар ҷараёни бунёди он қариб 20 нафар сохтмончиён бо ҷойи кор ва пас аз мавриди истифода қарор додани марҳилаи якум қариб 60 нафар бо ҷойи кори доимӣ таъмин мегарданд. Маҳсулоти корхона воридотивазкунанда буда, метавонад бозори дохилиро бо маҳсулоти ватанӣ таъмин созад.

Сафари кории Раиси вилоят Раҷаббой Аҳмадзода ба шаҳри Истаравшан

19 декабр Раиси вилояти Суғд Раҷаббой Аҳмадзода ба шаҳри Истаравшан сафар намуда, бо ҷараёни корҳои ободониву созандагӣ шинос гардид.

Ба истиқболи ҷашни таърихии 35-солагии Истиқлоли давлатии Ҷумҳурии Тоҷикистон дар шаҳри Истаравшан сохтмони корхонаҳои саноатӣ ва дигар иншооти муҳими иҷтимоӣ идома дорад, ки роҳбари вилоят рафти корҳо дар бархе иншооти ҷашниро мавриди таваҷҷуҳ қарор дод.

Дар деҳаи Вогати шаҳр бо саҳмгузории аъзои хоҷагии деҳқонии «Меҳринисо» барои беҳтар намудани ҳолати мелиоративии заминҳо чоҳи амудӣ кофта шуда, аъзои хоҷагии деҳқонӣ, ки ба ангурпарварӣ машғуланд, тасмим доранд, ки вазъи таъминот бо оби полезиро беҳтар ва ҳаҷми истеҳсоли маҳсулотро зиёд намоянд. Чуқурии чоҳи амудӣ беш аз 200 метр буда, барои иҷрои корҳо аз ҷониби хоҷагӣ маблаҳи зарурӣ равона гардидааст.