Дар рӯзи нахустини сафар ба Ҷумҳурии Туркия ҳайати вилояти Суғд бо роҳбарии Раиси вилояти Суғд Раҷаббой Аҳмадзода аз гармхонаҳои шаҳри Анталия боздид намуд.

Чуноне иттилоъ дода шуд, дар Анталия теъдоди зиёди гармхонаҳои инноватсионӣ мавҷуд буда, саҳми ин вилоят дар истеҳсоли маҳсулоти кишоварзӣ назаррас аст. Илова бар ин, марказҳои зиёди парвариши гулу ниҳолҳои ороишӣ фаъолият дошта, тарзу усули муосири парвариш истифода мегардад.

Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ҷалби сармоя ва таҳкими муносибатҳои иқтисодиву фарҳангӣ бо шарикони рушд ҳайати вилояти Суғд бо роҳбарии Раиси вилояти Суғд Раҷаббой Аҳмадзода ба Ҷумҳурии Туркия сафар кард.

Ҳадаф аз сафари ҳайат ба Ҷумҳурии Туркия ба роҳ мондани ҳамкориҳои судманд, густариш додани муносибатҳои тиҷоративу иқтисодӣ бо минтақаю шаҳрҳои Анталия, Қайсарӣ ва Истанбул буда, зимни сафари расмӣ намояндагони вилояти Суғд аз корхонаҳои саноатӣ, минтақаҳои озоди иқтисодӣ боздид карда, бо фаъолияти бахшҳои муҳими соҳаи кишоварзӣ шинос хоҳанд шуд.

Соли равон дар вилояти Суғд истеҳсоли 340 тонна пилла ба нақша гирифта шуда, айни замон ҷамъоварии пилла идома дорад. Дар ин бора зимни боздиди Раиси вилояти Суғд Раҷаббой Аҳмадзода аз нуқтаи қабули пилла дар ҶСК ба номи Абдураҳим Ҷумъаеви ноҳияи Бобоҷон Ғафуров иттилоъ дода шуд.

Дар ҶСК ба номи Абдураҳим Ҷумъаев имсол 500 қуттӣ кирмак тақсим гардида, кирмакпарварон тасмим доранд, ки 15 тонна пилла истеҳсол намоянд.

Раиси вилояти Суғд Раҷаббой Аҳмадзода дар Ҷамоати деҳоти Ғозиёни ноҳияи Бобоҷон Ғафуров оилаи Солеҳа Файзиеваро аёдат кард.

Ин оила ниёзманд ба ҳисоб рафта, бо дастгирии мақомоти иҷроияи ҳокимияти давлатии вилоят ва ноҳияи Бобоҷон Ғафуров барои онҳо манзили истиқоматӣ бунёд гардида истодааст. Бунёди манзил ва оиладор намудани фарзанди ягонааш орзуи деринаи Солеҳа Файзиева буд ва ҳамакнун ӯ хеле хушҳол аст, ки ба орзуи худ мерасад.

Дар Ҷамоати деҳоти Ғозиёни ноҳияи Бобоҷон Ғафуров барои беҳтар намудани вазъи таъминоти оби ошомиданӣ чоҳи амудӣ кофта шуд, ки дар натиҷа 300 оила бо оби нӯшокӣ таъмин гардид.

Раиси вилояти Суғд Раҷаббой Аҳмадзода дар суҳбат бо сокинони ҷамоат аз тадбирандешиҳои Ҳукумати Ҷумҳурии Тоҷикистон ҷиҳати ҳалли масъалаҳои деҳот ёдовар шуда, иброз дошт, ки дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои рушди деҳоти мамлакат маблағҳои зарурӣ ҷудо мегардад.

Дар шаҳри Истаравшан мавсими кирмакпарварӣ оғоз ёфта, дар нақша аст, ки имсол 7 тонна пилла истеҳсол карда шавад. Дар ин бора зимни шиносоии Раиси вилояти Суғд Раҷаббой Аҳмадзода бо рафти корҳои кирмакпарварӣ дар оилаи Қаюм Шодиев иттилоъ дода шуд.

Ба иттилои масъулин дар мавсими имсола ба 200 оилае, ки таҷрибаи кирмакпарварӣ доранд, 280 қуттӣ кирмак тақсим гардида, айни замон парвариши кирмак ҷараён дорад.