Имрӯз Раиси вилояти Суғд Раҷаббой Аҳмадзода дар ноҳияи Ҷаббор Расулов бо рафти корҳои саҳроӣ шинос гардид.

Дар хоҷагии деҳқонии "Норбой"-и Ҷамоати деҳоти Гулхона роҳбари вилоят вазъи нашъунамои пахтаро мавриди таваҷҷуҳ қарор дода, барои риояи ҳатмиии қоидаҳои агротехникӣ тавсияҳо дод. Дар хоҷагии мазкур дар 1,3 га пахта кишт шуда, кишоварзон бо нигоҳубини зироат машғул ҳастанд.

Раиси вилояти Суғд Раҷаббой Аҳмадзода дар доираи боздиди корӣ аз ноҳияи Ҷаббор Расулов бо фаъолияти нуқтаҳои банду басти пиёз дар шаҳраки Меҳробод шинос шуд.

Тавре маълумот дода шуд, дар ноҳия ҳашт маркази логистикӣ мавҷуд буда, дар ин нуқтаҳо пиёз аз рӯи намуду ҳаҷм банду баст карда шуда, содирот мегардад. Айни замон пиёз аз навоҳии вилояти Хатлон оварда шуда, ба кишварҳои Россия ва Қазоқистон тавассути қатора содирот шуда истодааст. Дар нуқтаҳои банду басти пиёз 2 000 нафар занон ба кор ҷалб гардида, маоши хуб мегиранд.

25 май Раиси вилояти Суғд Раҷаббой Аҳмадзода дар Ҷамоати деҳоти Деҳмойи ноҳияи Ҷаббор Расулов рафти ҷамъоварии пилларо мавриди таваҷҷуҳ қарор дод.

Чуноне маълумот дода шуд, оилаи Холмуродовҳо дар деҳоти Деҳмой ба кирмакпарварӣ машғул буда,  имрӯзҳо ҷамъоварии пилларо оғоз намуданд.

Имрӯз Раиси вилояти Суғд Раҷаббой Аҳмадзода дар Ҷамоати деҳоти Деҳмойи ноҳияи Ҷаббор Расулов бо фаъолияти пойгоҳи обкашии «Деҳмой-1» шинос гардид.

Пойгоҳи обкашӣ солҳои 60-уми қарни гузашта дар маҷрои дарёи Сир бунёд шуда, 6 агрегати он ниёз ба таъмири пурра пайдо карда, ду агрегати дигар умуман фаъолият намекард. Аз ин сабаб дар самти обёрии заминҳои кишоварзӣ дар ҷамоатҳои деҳоти Деҳмой, Гулхона, Сомониён, Ғулакандоз, инчунин қисман заминҳои ҳудуди деҳоти Ҳаёти нав мушкил ба вуҷуд меомад. Бо дастгирии Пешвои миллат муҳтарам Эмомалӣ Раҳмон соли 2020 пойгоҳи обкашӣ пурра таъмиру таҷдид гардида, муҳаррику дастгоҳҳои нав насб карда шуд, ки тавассути пойгоҳи обкашии «Деҳмой-1» 7885 гектар замини кишоварзӣ дар ноҳияи Ҷаббор Расулов бо оби полезӣ таъмин мешавад.

18 май дар шаҳри Қайсарии Ҷумҳурии Туркия Форуми тиҷоратии соҳибкорони Суғд ва Қайсарӣ баргузор гардид.

Дар кори форум Раиси вилояти Суғд Раҷаббой Аҳмадзода, Сафири Ҷумҳурии Тоҷикистон дар Ҷумҳурии Туркия Ашрафҷон Гулов, раисони як қатор шаҳру ноҳияҳои вилояти Суғд, масъулини Раёсати сармоягузорӣ ва идораи амволи давлатии вилояти Суғд, Палатаи савдо ва саноати Қайсарӣ, соҳибкорони тоҷику турк иштирок намуданд.

Дар доираи сафари худ ба Ҷумҳурии Туркия ҳайати вилояти Суғд аз якчанд корхонаҳои саноатии шаҳри Қайсарӣ боздид намуда, бо фаъолияти онҳо шинос гардид.

Раиси вилоят Раҷаббой Аҳмадзода ва ҳамроҳонаш аз ҷумла бо фаъолияти корхонаи истеҳсоли пойафзол шинос шуданд. Раиси вилоят аснои боздид таваҷҷуҳи соҳибкорони туркро ба соҳаи саноати вилояти Суғд ҷалб намуда, таъкид кард, ки захираву имкониятҳо барои коркарди пӯсту чарм ва ташкили корхонаи пойафзолбарорӣ дар вилояти Суғд мавҷуд аст. Ӯ аз таҷрибаи ҳамкории соҳибкорони тоҷик ва Федератсияи Россия ёдоварӣ кард, ки дар ҳамкорӣ дар шаҳри Исфара корхонаи пойафзолбарорӣ бунёд карда, маҳсулоти онро содирот намуда истодаанд.