Раиси вилояти Суғд Раҷаббой Аҳмадзода дар Конибодом бо нашъунамои пахта дар хоҷагии деҳқонии ба номи Роҳбар Қосимов шинос шуда, барои риояи қоидаҳои агротехникӣ ва озуқадиҳии зироат ба масъулин тавсияҳо дод.

Тибқи иттилои масъулини соҳаи кишоварзии Конибодом дар хоҷагиҳои деҳқонии ин минтақа 5402 гектар пахта кишт гардида, нашъунамои зироат хуб ва дар меъёри муқаррарӣ мебошад. Кишоварзон аҳлона заҳмат кашида, барои ба даст овардани ҳосили зиёд аз тамоми имкониятҳо истифода бурда истодаанд.

7 июн Раиси вилояти Суғд Раҷаббой Аҳмадзода ба шаҳри Конибодом ташриф оварда, бо рафти корҳои ободониву созандагӣ ва сохтмони иншооти гуногуни иҷтимоӣ шинос гардид.

Бояд таъкид кард, ки ба истиқболи ҷашнҳои Рӯзи Ваҳдати миллӣ ва 30-солагии Иҷлосияи таърихии XVI Шӯрои Олии Ҷумҳурии Тоҷикистон дар Конибодом сохтмони як қатор иншоот, аз ҷумла иншооти соҳаи маориф идома дорад. Аснои сафар роҳбари вилоят бо ҷараёни сохтмони бинои нави муассисаи таҳсилоти томактабии рақами 10, муассисаи таҳсилоти миёнаи рақами 15 ва муассисаи таҳсилоти миёнаи умумии рақами 7 шинос гардид.

7 июн Раиси вилояти Суғд Раҷаббой Аҳмадзода дар шаҳри Конибодом бо сохтмони фабрикаи мурғпарварӣ, коргоҳи дӯзандагӣ ва коргоҳи банду басти хушкмева шинос гардид.

Дар партави дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҷиҳати саҳмгузорӣ дар татбиқи ҳадафи чоруми стратегӣ-саноатикунонии мамлакат дар шаҳри Конибодом сохтмони корхонаҳои гуногун идома дорад. Яке аз чунин иншоот фабрикаи мурғпарварии ҶДММ «Конибодом паранда» аст, ки дар Ҷамоати деҳоти ба номи Абулқосим Лоҳутӣ ҷойгир шудааст. Фабрикаи мазкур аз ҷониби соҳибкорони ватанӣ ва бурунмарзӣ Фахридинова Хосият, Раҳимов Абдуаҳад ва Уроқов Суҳроҳбҷон ташкил шуда истодааст. Масоҳати умумии фабрика 5,6 гектар буда, дар он 4 бино барои парвариши мурғ мавҷуд аст ва дар ҳар яки он ба миқдори 15 000 сар мурғ парвариш карда мешавад. Тибқи лоиҳа дар як сол 600 тонна гўшти мурғ истеҳсол карда мешавад. Баъд аз ба истифода додани иншооти мазкур 20 нафар шаҳрвандон бо ҷойи кори доимӣ таъмин мешаванд. Инчунин, дар ҳудуди фабрика дар масоҳати 1,5 га боғи интенсивии зардолу ба миқдори 510 адад шинонида шуда, 6 гармхонаи парвариши лимў ба масоҳати 0,30 га сохта шуда, дар он тақрибан 1400 бех дарахти лимў парвариш хоҳад шуд.

Дар доираи сафари корӣ ба шаҳри Конибодом рӯзи 7 июн Раиси вилояти Суғд Раҷаббой Аҳмадзода корҳои азнавсозии Боғи фарҳангию фароғатии шаҳрро мавриди таваҷҷуҳ қарор дод.

Боғи мазкур дар масоҳати 2000 метри мураббаъ аз тарафи мақомоти иҷроияи ҳокимияти давлатии шаҳри Конибодом ва соҳибкорон азнавсозӣ гардида, дар ҳудуди боғи фарҳангӣ дар баробари бунёди фаввораҳо, суҳбаткадаҳо таҷҳизоти гуногун барои бозии бачагон васл карда мешавад. Корҳои таъмиру барқарорсозии иншооти фарҳангӣ соли 2021 оғоз гардида, корҳои сохтмонӣ аз ҷониби ҶДММ “Архикад” амалӣ шуда истодааст.

30 май Раиси вилояти Суғд Раҷаббой Аҳмадзода дар ноҳияи Шаҳристон бо ҷараёни сохтмони синфхонаҳои иловагии муассисаи таҳсилоти миёнаи умумии рақами 20 шинос гардид.

Муассисаи таҳсилоти миёнаи умумии рақами 20 дар деҳаи Фирдавсии ноҳия ҷойгир буда, сохтмони чор адад синфхонаи иловагӣ соли 2021 оғоз ёфта, дар арафаи анҷомёбӣ қарор дорад. Арзиши лоиҳавии сохтмон 700 ҳазор сомонӣ буда, барои хонандагон беҳтарин шароити таҳсил фароҳам оварда мешавад.

Бо мақсади таъмини иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дар арафаи Рӯзи байналмилалии ҳифзи кӯдакон имрӯз Раиси вилояти Суғд Раҷаббой Аҳмадзода дар ноҳияи Шаҳристон кӯдакон аз оилаҳои камбизоатро аёдат кард.

Раиси вилоят ба Марҷона Абдуллоева ва Шоҳсанам Туйчибекова туҳфаҳои идона тақдим карда, онҳоро ба муносибати Рўзи байналмилалии ҳифзи кўдакон табрик намуд.