22 июл Раиси вилояти Суғд Раҷаббой Аҳмадзода дар ноҳияи Мастчоҳ собиқадорони меҳнатро аёдат кард.

Раиси вилоят ба манзили Ҷумаев Абдуқаюм ва Сангинов Азим омада, бо пирони кор сӯҳбати самимӣ анҷом дод. Аснои суҳбат роҳбари вилоят аз саҳми собиқадорон дар рушди ҷомеа ва таваҷҷуҳи пайвастаи Пешвои миллат муҳтарам Эмомалӣ Раҳмон нисбат ба собиқадорон ёдоварӣ кард.

Дар ноҳияи Мастчоҳ Раиси вилояти Суғд Раҷаббой Аҳмадзода бо фаъолияти хоҷагиҳои деҳқонӣ шинос шуда, барои ҷамъоварии ҳосили пухтарасида ва гузаронидани кишти такрорӣ ба масъулин супоришҳо дод.

Раиси вилоят рафти ҷамъоварии полезиҳо, нашъунамои пахта, чормағзи заминӣ ва гузаронидани кишти такрориро мавриди таваҷҷуҳ қарор дод.

Бо ташаббуси соҳибкорони тоҷику турк фабрикаи ресандагии ноҳияи Мастчоҳ (собиқ "Олимтекстайлз") ба кор андохта мешавад. Дар ин бора зимни боздиди Раиси вилояти Суғд Раҷаббой Аҳмадзода аз ин корхона иттилоъ дода шуд.

Тибқи иттилои масъулин айни замон корҳои омодагӣ ва таҷдиду навсозии хатҳои технологӣ ҷараён дошта, дар мавсими имсолаи ҷамъоварии пахта корхона фаъолияти худро дар се баст ба роҳ мемонад. Дар корхона коркарди нахи пахта ба роҳ монда шуда, соҳибкорони тоҷику турк ният доранд, ки дар оянда маҳсулоти таёр истеҳсол намоянд. Дар фабрикаи ресандагӣ мутахассисони ҷавон ба кор қабул карда шуда, аз ҳисоби корхона аз омӯзиш мегузаранд. Дар назар аст, ки 300 бо ҷойи корӣ ва маоши баланд таъмин шаванд.

Раиси вилояти Суғд Раҷаббой Аҳмадзода дар ноҳияи Зафаробод аз як қатор хоҷагиҳои деҳқонӣ боздид карда, бо вазъи боғдориву нашъунамои зироатҳои кишоварзӣ шинос гардид.

Зимни боздид аз Кооперативи истеҳсолии «Саховати Куруш» иттилоъ дода шуд, ки кооператив соли 2021 дар масоҳати 120 га таъсис ёфтааст. Соли 2022 дар майдони 5 га боғи мевадиҳандаи интенсивӣ, аз он ҷумла 4 га себ ва 1 га шафтолу шинонида шудааст.

Раиси вилояти Суғд Раҷаббой Аҳмадзода аз пойгоҳҳои обкашии “Мирзочўл-1” ва “Мирзочўл-2”-и ноҳияи Зафаробод боздид намуда, бо вазъи таъминоти заминҳои кишоварзии ноҳия бо оби полезӣ шинос гардид.

Дар ноҳияи Зафаробод беш аз 30 ҳазор гектар замини кишоварзӣ вуҷуд дошта, тамоми заминҳои хоҷагиҳои деҳқонӣ тавассути пойгоҳҳои обкашӣ ва чоҳҳои амудӣ обёрӣ карда мешавад. “Мирзочўл-1” пойгоҳи асосии обкашӣ буда, дорои 6 дастгоҳи баландфишори ба баландии 95 метр оббароранда буда, ҳар як дастгоҳи обкашӣ ба ҳаҷми 6 куб об мекашад ва оби худро ба пойгоҳи обкашии “Мирзочўл-2” ва канали ТМ-1 мепартояд.

Раиси вилояти Суғд Раҷаббой Аҳмадзода зимни сафари корӣ ба ноҳияи Ашт бо ҷараёни таъмири роҳи Хуҷанд- Ашт шинос шуд.

Роҳи мазкур дар доираи корҳои ободонию созандагӣ ба истиқболи 30-солагии Иҷлосияи 16-уми Шӯрои Олии Ҷумҳурии Тоҷикистон бо ташаббуси роҳбарияти ноҳия ва саҳмгузории соҳибкорону саховатмандони ноҳия таъмир шуда истодааст.