Раиси вилояти Суғд Раҷаббой Аҳмадзода намояндагони ширкати чинии «Стейт инвестмент групп компани» - ро ба ҳузур пазируфт. 

Дар мулоқоти ҷонибҳо масъалаи ба роҳ мондани ҳамкорӣ ва воридсозии таҷҳизоти муосир барои истеҳсоли неруи барқ аз офтоб мавриди баррасӣ қарор гирифт. 

Раиси вилоят дар суҳбат иброз дошт, ки дар Ҷумҳурии Тоҷикистон ба рушди соҳаи саноат таваҷҷуҳи хоса зоҳир гардида, талаботи корхонаҳо ба нерӯи барқ низ сол аз сол зиёд гардида истодааст. Бо назардошти ин, вилояти Суғд омода аст барои истеҳсоли нерӯи барқи бештар аз фанновариҳои замон истифода намояд.

Иттилоъ дода шуд, ки ширкати мазкур дар самти истеҳсоли нерӯ аз ҳисоби нури офтоб маъруф аст ва чунин лоиҳаҳоро дар давлатҳои гуногун амалӣ кардааст.

Раиси вилояти Суғд Раҷаббой Аҳмадзода бо бо намояндагони музофоти Шэнсии Ҷумҳурии мардумии Чин мулоқот намуд. 

Зимни мулоқот ҷонибҳо аз таҳкими муносибатҳои дӯстона миёни Ҷумҳурии Тоҷикистон ва Ҷумҳурии мардумии Чин, ки натиҷаи сиёсати хирадмандонаи сарони ду давлат аст, изҳори қаноатмандӣ намуданд 

Таъкид гардид, ки вилояти Суғд бо минтақаҳои гуногуни Ҷумҳурии мардумии Чин ҳамкории тиҷоратию иқтисодӣ дорад. Ҳамкории тарафҳо дар бахшҳои гуногун, аз ҷумла саноати куҳӣ-металлургӣ назаррас буда, байни ду кишвар табодули маҳсулот сол ба сол зиёд гардида истодааст. 

Маълумот дода шуд, ки дар вилояти Суғд бо дастгириҳои пайвастаи Пешвои муаззами миллат муҳтарам Эмомалӣ Раҳмон соҳаи саноат, аз ҷумла саноати куҳкорӣ, истизроҷи ангишт, коркарди пахта рушд карда, вилоят метавонад дар ин замина ҳамкориҳоро тақвият бахшад.

Раиси вилояти Суғд Раҷаббой Аҳмадзода бо роҳбари Бонки аврупоии таҷдид ва рушд (БАТР) дар Тоҷикистон Холгер Вифел мулоқот намуд.

Дар мулоқоти ҷонибҳо масоили иқтисодиву сармоягузорӣ дар самтҳои обрасонӣ, энергетика, хизматрасонии нақлиёти мусофиркашон ва ғайра мавриди таҳлилу баррасӣ қарор дода шуд.

Раиси вилоят бо ёдоварӣ аз рушди соҳаҳои гуногуни хоҷагии халқи вилоят саҳми ташкилоти байналмилалии молиявиро дар татбиқи тарҳҳои бузург назаррас арзёбӣ кард. Бо сармоягузории Бонки аврупоии таҷдид ва рушд то имрӯз як қатор тарҳҳо, аз ҷумла лоиҳаи «Рушди нақлиёти ҷамъиятӣ дар шаҳри Хуҷанд» амалӣ шудааст.

Дар мулоқот таваҷҷуҳи меҳмонон ба навсозии пойгоҳҳои обкашӣ ва кашидани хатҳои оби полезӣ ҷалб карда шуд, роҳбарияти вилоят барои тақвияти ҳамкории дуҷониба изҳори омодагӣ намуд.

15 апрели соли 2024 дар шаҳри Гулистони вилояти Суғд ҷаласаи гуруҳҳои кории Ҷумҳурии Тоҷикистон ва Ҷумҳурии Қирғизистон баргузор гардид.

Дар ҷаласаи корӣ фармондеҳони қӯшунҳои сарҳадии ду кишвар Раҷабалӣ Раҳмоналӣ ва Уларбек Шаршиев, Раиси вилояти Суғд Раҷаббой Аҳмадзода ва намояндаи ваколатдори Президенти Қирғизистон дар вилояти Ботканд Абдикарим Алимбаев, роҳбарони сохторҳои ҳифзи ҳуқуқи ду тараф ва раисони шаҳру ноҳияҳои наздисарҳадӣ иштирок доштанд.

Дар мулоқот тазаккур дода шуд, ки дар натиҷаи фаъолияти назарраси гуруҳҳои кории ду ҷониб ва талошҳои муштараки мақомоти салоҳиятдор дар соли 2023 ва се моҳи соли 2024 муносибатҳои дӯстона ба роҳ монда шуда, ҷонибҳо масоили мавҷударо бо роҳи ҳамдигарфаҳмӣ ва риояи анъанаҳои неки ҳамсоядорӣ баррасӣ ва ҳал намуда истодаанд.

29 марти соли 2024 дар шаҳри Бодканди вилояти Бодканди Ҷумҳурии Қирғизистон мулоқоти навбатии ҳамраисони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистон ва Қирғизистон — Саймумин Ятимов ва Қамчибек Ташиев баргузор гардид. 

Роҳбарони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон муҳокимаи масъалаи делимитатсияи сарҳади давлатии Тоҷикистон ва Қирғизистонро дар қитъаҳои боқимонда идома дода, баҳри минбаъд муайян намудани хати сарҳад байни ду давлат ба натиҷаҳои назаррас ноил гардиданд.

Инчунин ба гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон ҷиҳати идомаи раванди делимитатсия ва демаркатсияи сарҳади давлатии Тоҷикистон ва Қирғизистон супоришҳои мушаххас дода шуд.

Имрӯз Раиси вилояти Суғд Раҷаббой Аҳмадзода директори тиҷоратии ширкати «Новапорт»-и Федератсияи Россия Сергей Дмитриевро ба ҳузур пазируфт.

Дар мулоқот масоили ҳамкории тарафайн ва густариши он мавриди муҳокима қарор гирифт.

Раиси вилоят зимни суҳбат аз талошу кӯшишҳои сарони ду давлат Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия Владимир Путин дар самти густариши хамкории мутақобила ва зиёд намудани мубодилаи молу маҳсулот байни ду кишвар ёдовар гашт.

Таъкид гардид, ки рушди ҳамкорӣ дар бахши хизматрасонӣ мусофирон тавассути ширкатҳои ҳавоӣ боиси зиёд гаштани рафту омади шахрвандон ва ҷалби ҳарчи бештари сайёҳон ба вилояти Суғд мегардад.