26 октябр Раиси вилояти Суғд Раҷаббой Аҳмадзода бо директори генералии ҶДММ "Хуаксин Ғаюр Суғдсемент" Чжоу Чжиюсун мулоқот намуд.
Ҷонибҳо аснои мулоқот доир ба фаъолияти имрӯзаи корхона, афзун намудани ҳаҷми истеҳсоли маҳсулот, содироти семент ба хориҷи кишвар мубодилаи афкор намуданд.
Иттилоъ дода шуд, ки ҶДММ "Хуаксин Ғаюр Суғдсемент" калонтарин корхонаҳои истеҳсолкунандаи семент буда, он дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бунёд гардида буд. Агар дар соли 2016 дар корхона 429 ҳазор тонна семент ба маблағи 208,8 миллион сомонӣ истеҳсол шуда бошад, дар соли 2021 ба маблағи 666,6 миллион сомонӣ 1,2 миллион тонна семент истеҳсол карда шудааст. Яъне ҳаҷми истеҳсоли маҳсулот сол аз сол зиёд шуда, бозори дохилӣ бо ин навъи маҳсулоти сохтмонӣ таъмин гардида истодааст. Ҳамзамон қисме аз маҳсулот ба хориҷи кишвар низ содирот мешавад. Дар нӯҳ моҳи соли ҷорӣ дар корхона 933,5 ҳазор тонна семент истеҳсол шудааст, ки маблағи он 415,2 миллион сомонӣ аст.
Раиси вилоят ба роҳбарияти корхона барои ҳарчи бештар намудани ҳаҷми истеҳсоли маҳсулот, зиёд намудани содирот, иҷрои ӯҳдадориҳо ва корҳои ободонию созандагӣ тавсияҳо дода, таъкид кард, ки корхона бояд соли ҷориро бо нишондиҳандаҳои назаррас ҷамъбаст намояд.
Хадамоти матбуоти
Раиси вилояти Суғд
