8 апрели соли 2025 Раиси вилояти Суғд Раҷаббой Аҳмадзода зимни сафари корӣ ба ноҳияи Ҷаббор Расулов дар маросими оғози кишти пахта дар хоҷагии деҳқонии “Муъминбобо”-и Ҷамоати деҳоти Гулхона ширкат варзид.

Хоҷагии деҳқонии “Муъминбобо”, ки соли 2004 таъсис ёфтааст, дорои 33 гектар замини корам буда, аз он 23 гектар барои кишти пахта ҷудо шудааст. Тибқи нақша ва таъкиди кишоварзон аз ҳар гектар то 30-40 сентнер ҳосил ба даст оварда мешавад.

Зимни суҳбат бо кишоварзон Раиси вилоят барои самаранок истифода бурдани ҳар ваҷаб замин, татбиқи усулҳои муосири кишоварзӣ ва баланд бардоштани ҳосилнокӣ, таъмини иҷрои нақшаи истеҳсолӣ супоришҳо дод. 

8 апрели соли 2025 дар муассисаи таҳсилоти миёнаи умумии №1-и шаҳраки Меҳрободи ноҳияи Ҷаббор Расулов майдончаи муосири варзишӣ ба истифода дода шуд. 

Дар маросими баистифодадиҳии иншооти варзишӣ Раиси вилояти Суғд Раҷаббой Аҳмадзода иштирок намуд.

Чуноне иттилоъ дода шуд, майдончаи варзишӣ дар доираи омодагиҳо ба ҷашни 35-солагии Истиқлоли давлатии Ҷумҳурии дар бо ташаббуси волидайни хонандагон ва дастгирии мақомоти маҳаллӣ бунёд гардидааст.

Майдонча барои бозии футбол пешбинӣ гардида, дар масоҳати 800 метри мураббаъ сохта шуд. Иншооти варзишӣ ба маблағи зиёда аз 250 ҳазор сомонӣ бунёд гардида, барои ба варзиш машғул шудани наврасону ҷавонон шароити мусоид фароҳам оварда шуд.

Бо мақсади сазовор истиқбол гирифтани 35-солагии Истиқлоли давлатии Ҷумҳурии Тоҷикистон дар шаҳри Гулистон корҳои ободониву созандагӣ, сохтмон ва навсозии иншооти ҷашнӣ бомаром идома дорад.

Аз ҷониби мақомоти иҷроияи ҳокимияти давлатии шаҳр таваҷҷуҳи хоса ба рушди соҳаи саноат ва таъсиси корхонаҳои истеҳсолӣ равона гардида, ҳамасола хатҳои нави истеҳсолӣ мавриди истифода қарор мегиранд.

Зимни сафари корӣ ба шаҳри Гулистон Раиси вилояти Суғд Раҷаббой Аҳмадзода бо ҷараёни сохтмони корхонаҳо ва васлу насби дастгоҳу таҷҳизоти нав шинос гардид.

Яке аз чунин корхонаҳо ҶДММ “Тиглат” мебошад, ки сохтмони он идома дошта, дар оянда дар он истеҳсоли рангҳои бинокорӣ ва хокаи ороишиву пардоздиҳӣ ба роҳ монда мешавад. Айни замон корҳои сохтмонӣ ва насби таҷҳизоти муосир идома дошта, пас аз ба кор андохтани он 70 нафар сокинони маҳаллӣ бо ҷойи кори доимӣ таъмин мегарданд.

Раиси вилояти Суғд Раҷаббой Аҳмадзода зимни сафари кории худ ба шаҳри Бӯстон бо раванди сохтмони як қатор иншооти ҷашнӣ аз наздик шинос гардид. 

Ба истиқболи 35-солагии Истиқлолияти давлатии Ҷумҳурии Тоҷикистон дар шаҳр тадбирҳои судманд амалӣ гардида истодааст, ки дар он саҳми соҳибкорон низ назаррас аст.

Бо саҳми соҳибкори маҳаллӣ Ҷамшед Дадоматов дар шаҳри Бӯстон корхонаи истеҳсоли газоблок бунёд шуда истодааст. Корхонаи мазкур бо истифода аз технологияи муосир маҳсулоти босифати сохтмонӣ истеҳсол хоҳад кард. Раиси вилоят зимни шиносоӣ бо ҷараёни корҳои сохтмонӣ таъкид дошт, ки таъсиси чунин корхонаҳо ба таъмини бозори дохилӣ бо маҳсулоти ватанӣ мусоидат менамояд. Дар марҳилаи аввали фаъолият дар корхона аз 40 то 60 нафар бо ҷойи кори доимӣ таъмин хоҳанд шуд.