Ноҳияи Спитамен аз ҷумлаи минтақаҳои пешсафи вилояти Суғд дар соҳаи кишоварзӣ маҳсуб меёбад. Бо мақсади таъмини мунтазами оби полезӣ ва баланд бардоштани ҳосилнокии зироатҳо дар соли оянда таъмири пойгоҳҳои обкашии ноҳия аз ҳоло оғоз ёфтааст.

Раиси вилояти Суғд Раҷаб Аҳмадзода зимни сафари корӣ бо ҷараёни таъмири пойгоҳҳои обкашӣ шинос шуд. Тавре иттилоъ дода шуд, таъмиру навсозии 26 дастгоҳи обкаш ба нақша гирифта шуда, то имрӯз 7 агрегат пурра омода ва ба кор дароварда шудааст.

Мавриди зикр аст, ки барои обёрии заминҳои киштшаванда дар ноҳияи Спитамен 13 пойгоҳи обкашӣ фаъолият доранд. Бо дастгирии Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд ҳамасола дастгоҳҳои нави обкашӣ харидорӣ ва насб карда мешаванд, ки ин иқдом ба таъмини устувори заминҳои киштшаванда ва рушди соҳаи кишоварзӣ мусоидат менамояд.

Раиси вилояти Суғд Раҷаб Аҳмадзода зимни сафари корӣ ба Ҷамоати деҳоти Истиқлоли ноҳияи Спитамен бо ҷараёни корҳои сохтмонӣ ва бунёди иншооти ҷашнӣ шинос шуд.

Дар деҳаи Саидқалъаи ҷамоат бо ташаббуси соҳибкор Фурқат Абдуҷабборов бинои баландошёнаи истиқоматӣ бунёд гардида, дар ошёнаи якуми он маркази хизматрасонӣ ҷойгир хоҳад шуд. Дар паҳлӯи бино инчунин коргоҳи истеҳсоли пойафзол ва сехи дӯзандагӣ сохта мешаванд, ки пас аз ба истифода супоридани онҳо даҳҳо сокини маҳаллӣ бо ҷойи кори доимӣ таъмин мегарданд. 

Раиси вилоят зимни боздид фаъолияти соҳибкоронро намунаи ибрат арзёбӣ намуда, барои идомаи корҳои ободониву бунёдкорӣ дастуру тавсияҳои судманд дод.

24 октябр дар Кохи фарҳанги ба номи Абӯабдуллоҳи Рӯдакӣ ба муносибати Рўзи кормандони мақомоти судӣ ҷамъомади тантанавӣ баргузор гардид.

Дар чорабинӣ Раиси вилояти Суғд Раҷаб Аҳмадзода, муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён, муовини Раиси Суди Олии Ҷумҳурии Тоҷикистон Тағозода Абдуқаҳҳор Саидмурод, роҳбарияти мақомоти суди вилоят ва шаҳру ноҳияҳо, инчунин собиқадорон иштирок намуданд.

Раиси вилояти Суғд Раҷаб Аҳмадзода зимни иштирок ва суханронӣ дар чорабинӣ иброз дошт, ки мақомоти судӣ яке аз ниҳодҳои муҳими давлатдорӣ мебошад, ки фаъолияти он ба ҳифзи арзишҳои ҷомеаи демократӣ, таъмини адолати судӣ, ҳуқуқу озодиҳои инсон ва шаҳрванд равона гардидааст.

23 октябр дар шаҳраки Зарафшони ноҳияи Зафаробод бо иштироки Раиси вилояти Суғд Раҷаб Аҳмадзода маркази хизматрасонии нав бо номи “Зарафшон” ба истифода дода шуд.

Иншооти мазкур бо саҳми соҳибкор Зафар Авулов дар доираи корҳои созандагиву ободонӣ ба ифтихори 35-солагии Истиқлоли давлатии Ҷумҳурии Тоҷикистон бунёд гардидааст. 

Пас аз ифтитоҳи марказ Раиси вилоят аз номи Пешвои миллат муҳтарам Эмомалӣ Раҳмон ба кӯдакони ятим туҳфаҳои идона тақдим намуда, таъкид дошт, ки давлату Ҳукумат ҳамеша ятимону ниёзмандонро таҳти таваҷҷуҳ ва ғамхорӣ қарор медиҳад. Гуфта шуд, ки бо дастгирии мақомоти давлатӣ барои таҳсил ва зиндагии шоистаи онҳо мунтазам шароити зарурӣ муҳайё карда мешавад.