Соҳили зебоманзари “Баҳри тоҷик” яке аз мавзеъҳои дилфиреби шаҳри Гулистон буда, ҳамасола ҳазорҳо меҳмонону сайёҳон аз дохил ва хориҷи кишвар барои истироҳату фароғат ба ин ҷо рӯ меоранд.

Зебоиҳои табиӣ боис гардида, ки солҳои охир дар ин минтақа корҳои созандагиву ободонӣ рушд ёфта, барои қабули сайёҳону гардишгарон имкониятҳои беҳтар фароҳам оварда шавад. 

Бо дарки муҳимияти рушди соҳаи сайёҳӣ ва истифодаи самараноки имкониятҳои табиӣ бо ташаббуси соҳибкори маҳаллӣ Турсуной Зокирова дар соҳили “Баҳри тоҷик” бунёди осоишгоҳи нав ҷараён дорад . Тибқи лоиҳа осоишгоҳ барои қабули 250 истироҳаткунанда пешбинӣ шудааст. Баъди ба истифода додани иншоот даҳҳо сокини маҳаллӣ бо ҷойи кори доимӣ таъмин хоҳанд шуд.

Дар шаҳри Хуҷанд корҳои сохтмонии бинои нави Муассисаи давлатии “Қароргоҳи Сарвари давлати Ҷумҳурии Тоҷикистон дар шаҳри Хуҷанд” расман оғоз гардид.

Маросими гузоштани санги асос бо иштироки Раиси вилояти Суғд Раҷаб Аҳмадзода ва аҳли зиё баргузор шуд.

Тибқи лоиҳа иншоот аз таҳхона ва чор ошёна иборат хоҳад буд. Дар таҳхона таваққуфгоҳ, нуқтаҳои санитарӣ ва ҳуҷраҳои техникии хизматрасонӣ ҷойгир мешаванд. Дар ошёнаҳои болоӣ бошад, осорхонаи Пешвои миллат, толорҳои универсалӣ ва маҷлисгоҳ, толорҳои музокирот ва нишасти матбуотӣ, меҳмонхона ва дигар утоқҳои зарурӣ пешбинӣ шудааст. Бино бо санъати баланди меъмории миллӣ бунёд меёбад.

25 ноябр дар назди Театри мазҳакаи мусиқии ба номи Камоли Хуҷандии шаҳри Хуҷанд ҷамъомади тантанавӣ ва қадршиносии ғолибони мусобиқаи меҳнатӣ баргузор шуд.

Дар чорабинӣ ба ноҳияҳое, ки нақшаи истеҳсоли пахтаро иҷро намуданд, электромобилҳои муосир тақдим гардид.

Раиси вилояти Суғд Раҷаб Аҳмадзода зимни суханронӣ таъкид кард, ки Ҳукумати Ҷумҳурии Тоҷикистон таҳти раҳнамоии Пешвои миллат муҳтарам Эмомалӣ Раҳмон ба рушди соҳаи кишоварзӣ, аз ҷумла пахтакорӣ, диққати махсус зоҳир менамояд. Истифодаи усулҳои нави инноватсионӣ, тухмиҳои серҳосил ва риояи қоидаҳои агротехникӣ имкон дод, ки пахтакорони Суғд соли равон дастовардҳои худро афзоиш диҳанд.

Тибқи маълумоти оморӣ то санаи 25 ноябр дар вилояти Суғд 118 ҳазору 223,2 тонна пахта ҷамъоварӣ шудааст, ки беш аз 90 фоизи нақшаи солона буда, нисбат ба ҳамин давраи соли гузашта қариб 40 ҳазор тонна зиёд мебошад.

24 ноябр дар толори калони Мақомоти иҷроияи ҳокимияти давлатии вилояти Суғд таҳти раёсати Раиси вилоят Раҷаб Аҳмадзода ҷаласаи фаъолони соҳаи меъморӣ, сохтмон ва шаҳрсозӣ баргузор гардид.

Дар ҷаласаи корӣ муовинони Раиси вилоят, роҳбарони воҳиду сохторҳои вилоятӣ, раисони шаҳру ноҳияҳо, меъморону муҳандисон, масъулини бахши роҳсозӣ, замин, муҳити зист, назорати санитарию эпидемиологӣ, ҳолатҳои фақуллода, сӯхторнишонӣ, ширкатҳои сохтмонӣ, соҳибкорон, раисони ҷамоату деҳот ва дигар масъулин ширкат варзиданд. 

Ҷаласаи корӣ бо мақсади таъмини иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки санаи 19-уми ноябр дар шаҳри Гулистон баён гардида буд, баргузор гардида, дар он вазъи соҳаи меъмориву шаҳрсозӣ мавриди таҳлилу баррасӣ қарор дода шуд.