Мулоқоти Раиси вилоят бо роҳбари ширкати чинии "Liaoning Lide"

Раиси вилояти Суғд Раҷаббой Аҳмадзода роҳбари ширкати чинии "Liaoning Lide" Жанг Жинминг ва ҳамроҳонашро ба ҳузур пазируфт. 

Дар мулоқот масоили ҳамкории мутақобила ва тадриҷан густариш додани онҳо, таҳия ва татбиқи лоиҳаҳои муштарак мавриди баррасӣ қарор гирифт. Раиси вилоят зимни муаррифии имкониятҳои вилояти Суғд таъкид дошт, ки вилоят чун "водии имкониятҳо" шинохта шуда, ҷиҳати рушди соҳаҳои иқтисодиву иҷтимоии вилоят як қатор барнома ва лоиҳаҳои хурду бузург амалӣ карда мешавад. 

Дар вилоят садҳо корхонаи хурду бузург фаъолият дошта, талабот ба нерӯи барқ зиёд гардида истодааст. Аз ин лиҳоз, истифода аз манбаъҳои гуногун метавонад талабот ба нерӯи барқро қонеъ созад.

Сокинон маблағи барои ҳаҷ ҷамъовардаи худро барои мумфарш кардани роҳҳо сарф карданд

Сокинони вилояти Суғд аз мулоқоти Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷомеаи кишвар рӯҳу илҳоми тоза гирифта, дар иҷрои корҳои хайру савоб пешсафанд.

Дар ноҳияи Спитамени вилоят гуруҳи сокинони деҳоти Тағояк тасмим гирифтаанд, ки маблағҳои барои ҳаҷ ҷамъовардаи худро дар ободии маҳал сарф намоянд. 

Бо ташаббуси сокинон дар марҳилаи аввал 5 км роҳи деҳот пурра мумфарш карда шуда, минбаъд низ корҳои хайр анҷом дода хоҳад шуд. 

Раиси вилоят ин кори сокинонро садақаи ҷория арзёбӣ карда, таъкид намуд, ки саҳмгузорӣ дар ободии сарзамини аҷдодӣ низ кори савоб аст. 

Шиносоӣ бо фаъолияти кирмакпарварон дар шаҳри Истаравшан ва ноҳияи Спитамен

Раиси вилояти Суғд Раҷаббой Аҳмадзода дар шаҳри Истаравшан бо рафти парвариши кирмак шинос гардид. 

Аҳли оилаи Тошовҳо бо меҳнати худ дар рушди соҳаи кишоварзӣ саҳм гузошта, ҳамасола дар ин шабу рӯз ба кирмакпарварӣ машғул ҳастанд. 

Бо истифода аз таҷрибаи кофӣ ин оила имсол низ якуним қуттӣ кирмак гирифта, тасмим доранд, ки пиллаи истеҳсолкардаи худро ба давлат супоранд. Соли равон дар шахри Истаравшан 280 қуттӣ кирмак парвариш карда шуда, хоҷагидорон нақшаи гузошташударо иҷро намоянд. 

Раиси вилоят ба оилаи Тошовҳо барои хизмати софдилонаашон изҳори сипос намуда, ба онҳо туҳфаҳои хотиравӣ супорид. Қайд карда шуд, ки бо заҳмати шабонарӯзии чунин оилаҳо ҳамасола пиллаи зарурӣ истеҳсол мегардад.

Аёдати ҷавонони бемор дар шаҳри Истаравшан ва ноҳияи Спитамен

Бахшида ба Рӯзи ҷавонони Тоҷикистон Раиси вилояти Суғд Раҷаббой Аҳмадзода дар шаҳри Истаравшан ва ноҳияи Спитамен ҷавонони маъюбу беморро аёдат кард.

Раҷаббой Аҳмадзода дар шаҳри Истаравшан аз ҳоли Рухшона Мирашурова ва Элёр Нарзуллоев, ки маъюби гуруҳи якум ва дуюм ҳастанд, хабар гирифт.

Зимни аёдат роҳбари вилоят фарорасии Рӯзи ҷавононро ба ҷавонони бемор табрик гуфта, ба онҳо кӯмакҳои моддӣ расонид. Таъкид гардид, ки беморону маъюбон ва эҳтиёҷмандону оилаҳои ниёзманд зери таваҷҷуҳи доимии Пешвои миллат муҳтарам Эмомалӣ Раҳмон қарор дошта, Ҳукумати Тоҷикистон барои дастгирии қишри ниёзманди ҷомеа тадбирҳои заруриро амалӣ менамояд.

Таҷлили Рӯзи ҷавонони Тоҷикистон дар вилояти Суғд

Шоми 21 май дар майдони назди Театри мазҳака ва мусиқии ба номи Камоли Хуҷандӣ бахшида ба Рӯзи ҷавонони Тоҷикистон чорабинии идона баргузор гардид.

Раиси вилояти Суғд Раҷаббой Аҳмадзода зимни суханронӣ ҷавонони саодатмандро ба ифтихори Рӯзи ҷавонони Тоҷикистон, ки яке аз санаҳои муҳимми таърихи кишвари соҳибистиқлоламон мебошад, самимона табрику муборакбод намуд.

Қайд карда шуд, ки таҳти роҳбариву раҳнамоии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз оғози даврони соҳибистиқлолӣ ба ҷавонон таваҷҷуҳу ғамхории махсус зоҳир гардида, ба хотири дастгирии ҳамаҷонибаи онҳо пайваста тадбирҳои зарурӣ амалӣ мегардад.