Ба истиқболи 35-солагии Истиқлоли давлатии Ҷумҳурии Тоҷикистон дар шаҳри Хуҷанд корҳои ободониву бунёдкорӣ вусъат меёбад.

Раиси вилояти Суғд Раҷаббой Аҳмадзода дар соҳили рости дарёи Сир бо раванди азнавсозии роҳраву истироҳатгоҳи шафати он шинос гардид.

Тавре иттилоъ дода шуд, бо дастгирии Мақомоти иҷроияи ҳокимияти давлатии вилояти Суғд роҳрави соҳили дарёи Сир азнавсозӣ карда шуда, ин мавзеъ ба минтақаи истироҳатии замонавӣ табдил дода мешавад. 

Дар ноҳияи Айнӣ ба рушди соҳаи кишоварзӣ таваҷҷуҳи зарурӣ зоҳир гардида, аз ҷониби сокинону соҳибкорон боғҳои интенсивӣ бунёд гардида истодааст.

Чуноне зимни боздиди Раиси вилояти Суғд Раҷаббой Аҳмадзода иттилоъ дода шуд, бо мақсади баланд бардоштани нишондиҳандаҳои истеҳсолӣ дар ноҳия бунёди боғҳои интенсивӣ ба роҳ монда шуда, ба истифодаи оқилонаи замин ва васеъ намудани майдони кишти зироатҳои кишоварзӣ диққати махсус дода мешавад.

Раиси вилояти Суғд Раҷаббой Аҳмадзода таъкид дошт, ки бо истифода аз имкониятҳои мавҷуда бояд майдони боғҳои интенсивӣ боз ҳам васеъ карда шавад. Амалисозии чунин иқдомҳо ба самаранок истифода шудани замин ва афзоиши ҳаҷми истеҳсоли маҳсулоти кишоварзӣ мусоидат хоҳад кард.

Дар партави сиёсати хирадмандонаи Пешвои миллат муҳтарам Эмомалӣ Раҳмон ва ба истиқболи ҷашни 35-солагии Истиқлоли давлатии Ҷумҳурии Тоҷикистон дар ноҳияи Айнӣ сохтмони як қатор иншооти ҷашнӣ идома дорад.

Зимни сафари корӣ ба ноҳияи Айнӣ Раиси вилояти Суғд Раҷаббой Аҳмадзода бо рафти бунёди муассисаҳои таълимӣ ва фарҳангӣ дар маҳалҳои гуногуни ноҳия шинос гардид.

Дар шаҳраки Зарафшон сохтмони бинои нави муассисаи таҳсилоти миёнаи умумии рақами 37 оғоз шудааст. Фармоишгари иншоот Корхонаи фаръии “Шахтаи Фон-Яғноб” буда, айни ҳол корҳо аз ҷониби пудратчиён ҷараён дорад.

Ба истиқболи 35-солагии Истиқлоли давлатии Ҷумҳурии Тоҷикистон дар ноҳияи Айнӣ корҳои созандагиву ободонӣ вусъат меёбад. Яке аз иқдомҳои муҳим — мумфаршкунии роҳи мошингарди Зарафшон–Искандаркӯл ба шумор меравад, ки бо дастуру супоришҳои Пешвои миллат муҳтарам Эмомалӣ Раҳмон амалӣ мегардад.

Дар маросими оғози расмии мумфаршкунии роҳ, ки бо иштироки Раиси вилояти Суғд Раҷаббой Аҳмадзода баргузор гардид, таъкид шуд, ки бо татбиқи чунин лоиҳаҳои муҳим ҳолати роҳҳо беҳтар шуда, вазъи иқтисодии сокинон низ хубтар хоҳад шуд.

Раиси вилояти Суғд Раҷаббой Аҳмадзода иброз дошт, ки таҷдиди роҳи мазкур барои беҳтар гардидани рафтуомади сокинон ва ҷалби бештари сайёҳон ба мавзеи зебои Искандаркӯл аҳамияти калон дорад. Зеро ноҳияи Айнӣ яке аз минтақаҳои зебову сайёҳии кишвар маҳсуб ёфта, ҳамасола шумораи зиёди гардишгарони дохиливу хориҷӣ ба ноҳия ташриф меоранд.