Машварати корӣ бо масъулини соҳаи кишоварзӣ

12 май дар толори хурди мақомоти иҷроияи ҳокимияти давлатии вилоят таҳти раёсати Раиси вилояти Суғд Раҷаббой Аҳмадзода ва бо ҳузури муовини Сарвазири мамлакат Сулаймон Зиёзода ва вазири кишоварзӣ Қурбон Ҳакимзода машварати корӣ баргузор гардид.

Дар машварат муовинони Раиси вилоят, роҳбари дастгоҳи Раиси вилоят, раисони шаҳру ноҳияҳо, сардорони раёсату шуъбаҳои кишоварзии шаҳру ноҳияҳо, омор, беҳдошти замин ва обёрӣ, кумитаи замин ва дигар ташкилоту муассисаҳо иштирок доштанд.

Дар машварати корӣ таъкид карда шуд, ки мақомоти иҷроияи ҳокимияти давлатии вилоят ҷиҳати таъмини иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тадбирҳои заруриро амалӣ намуда, кишоварзони вилоят саҳми назарраси худро дар таъмини амнияти озуқаворӣ гузошта истодаанд.

Шиносоии Раиси вилоят бо сохтмони иншооти ҷашнӣ дар Хуҷанд

Имрӯз Раиси вилояти Суғд Раҷаббой Аҳмадзода дар шаҳри Хуҷанд бо сохтмону барқарорсозии корхонаҳои саноатӣ шинос гардид. 

Раиси вилоят нахуст аз ҶДММ «Зиннат» боздид кард. Тавре иттилоъ дода шуд, корхона бо ширкати "БТК Групп"-и Федератсияи Россия дар самти дӯзандагӣ ҳамкориро ба роҳ мондааст. Истеҳсолот аз нимсолаи дуюми соли 2024 оғоз мегардад ва дар он 350 нафар ба кор ҷалб карда мешаванд. 

Дар корхона корҳои таҷдиду навсозӣ идома дошта, барои ҷалби дўзандагон корҳо идома дорад. Дар корхона дўзандагони аз сини 18 сола то 50 сола бо музди меҳнати 1500 сомонӣ ва шогирдон аз сини 18 сола боло бо маоши 1200 сомонӣ ба кор қабул карда хоҳанд шуд. 

Боздиди Раиси вилоят аз Боғи миллии "Ваҳдат"

Ҳамасола дар вилояти Суғд дар доираи татбиқи барномаҳои давлатӣ боғу токзори нав бунёд ва бо иҷрои саривақтии тадбирҳои агротехникӣ ҳаҷми истеҳсоли мева зиёд карда мешавад.  

Масоҳати умумии боғҳо дар ҳама бахшҳои хоҷагидории вилоят 76 ҳазору 860 гектарро ташкил медиҳад ва аз ин 57 ҳазору 240 гектараш ҳосилдиҳанда мебошад. 

Боғи миллии "Ваҳдат", ки аз калонтарин хоҷагиҳои кишоварзии вилояти Суғд ба ҳисоб меравад, соли 2008-ум таъсис ёфта, масоҳати умумии он 631 гектарро ташкил медиҳад. 

Хоҷагидорони муассисаи мазкур, ки дар таъмини фаровонии бозори дохилӣ ва тақвияти иқтидори содиротии мамлакат саҳми назаррасу шоиста доранд, асосан дар ин ҷо боғи зардолу, шафтолу, олу, гелос, себ, нок, бодом, чормағз, биҳӣ, ангур ва анор бунёд намуда, ҳамасола бо истифодаи самараноки захираҳои мавҷуда, аз ҷумла обу замин ба нишондиҳандаҳои назарраси истеҳсолӣ ноил мегарданд. 

Маросими ёдбуди шаҳидони Ҷанги Бузурги Ватании солҳои 1941-1945

8 майи соли 2024 дар назди муҷассамаи ёдгории шаҳидони Ҷанги Бузурги Ватании солҳои 1941-1945, воқеъ дар мавзеи Панҷшанбеи шаҳри Хуҷанд маросими гулгузорӣ ва ёдбуди шаҳидон баргузор гардид.

Раиси вилояти Суғд Раҷаббой Аҳмадзода, собиқадорони ҷангу меҳнат ва намояндагони аҳли зиёи вилоят, ҷомеаҳои меҳнатӣ, омӯзгорону толибилмони макотиби оливу миёнаи касбӣ , мактабҳои таҳсилоти ҳамагонӣ ва дигарон бар пояи муҷассамаи ёдбуди шаҳидони ҷанг гулҳои тару тоза гузошта, хотири шаҳидону қурбониёни Ҷанги Бузурги Ватаниро пос доштанд.

Ёдовар бояд шуд, ки ҳамасола 9 май дар қатори халқҳои дигари сулҳдӯсти сайёра дар кишвари соҳибистиқлоли мо низ санаи таърихии Рӯзи Ғалаба бар фашизм ботантана таҷлил мегардад. Соли равон аз таърихи муборизаҳои фидокоронаи дар майдонҳои Ҷанги Бузурги Ватанӣ нишондодаи фарзандони кишвари азизамон Тоҷикистон 79 сол сипарӣ гардид.

Паёми табрикии Раиси вилоят ба муносибати Рӯзи Ғалаба дар Ҷанги Бузурги Ватанӣ

Ҳамасола нуҳуми май дар қатори халқҳои дигари сулҳдӯсти сайёра дар кишвари соҳибистиқлоли мо низ санаи таърихии Рӯзи Ғалаба бар фашизм ботантана таҷлил мегардад.​

Соли равон аз таърихи муборизаҳои фидокоронаи дар майдонҳои Ҷанги Бузурги Ватанӣ нишондодаи фарзандони кишвари азизамон Тоҷикистон 79 сол сипарӣ гардид.

Ба ин муносибат, иштирокчиёни ҷанг, собиқадорони меҳнат ва кулли мардуми вилоятро ба фарорасии Рӯзи Ғалаба сидқан табрик гуфта, ба хонадони мардуми Ватани маҳбубамон сулҳу оромӣ, хушбахтӣ, иқболи баланд ва рӯзгори орому осуда орзу менамоям.

Дар ин ҷанги хонумонсӯз аз кишвари мо беш аз 300 ҳазор нафар мардони далеру шуҷоъ сафарбар гардиданд, ки ин шумора 20 фоизи аҳолии Тоҷикистонро ташкил медод. Аз ин рӯ, қадршиносӣ ва ба ёд овардани корномаи беназири падарони қаҳрамон, инчунин насли калонсол, занон ва наврасоне, ки дар ақибгоҳ шабонарӯз заҳмат кашида, дар таъмини афсарону сарбозон бо маводи ғизоӣ, сару либос ва дигар лавозимоти зарурӣ саҳми арзишманди худро гузоштанд, вазифаи ҳар як шаҳрванди ватандӯст маҳсуб меёбад.