Раиси вилояти Суғд Раҷаб Аҳмадзода дар шаҳри Бӯстон бо рафти корҳои навсозӣ ва таҷдиди меҳмонхонаи “Хуҷанд” шинос гардид.

Меҳмонхонаи “Хуҷанд” аз 14 ошёна иборат буда, барои қабули то 300 нафар меҳмон дар як вақт пешбинӣ шудааст. Иншоот бо тарҳи муосир таҷдид гардида, ҳуҷраҳо, утоқҳои корӣ ва дигар бахшҳои хизматрасонӣ мутобиқ ба талаботи меъёрҳои байналмилалӣ навсозӣ мешаванд.

Ҳамзамон, бунёди як қатор иншооти хизматрасонӣ, аз ҷумла тарабхона, маҷлисгоҳ (конфронс-зал) барои баргузории ҳамоишҳо ва чорабиниҳо, ҳавзҳои шиноварии болопӯшида ва мавсимӣ, амфитеатр, ҳаммом ва дигар иншооти ёрирасон ба нақша гирифта шудааст. Амалӣ гардидани ин тарҳ имконият медиҳад, ки меҳмонхона бо сифати баланд ба меҳмонони дохиливу хориҷӣ хизмат расонад.

Раиси вилояти Суғд Раҷаб Аҳмадзода дар ноҳияи Бобоҷон Ғафуров ва шаҳри Бӯстон бо рафти бунёди як қатор корхонаҳои бузурги саноатӣ шинос гардид.

Зимни боздид аз ҶДММ «Фаровон» ба роҳбари вилоят иттилоъ дода шуд, ки масъулони корхона бо мақсади иҷрои дастуру супоришҳои Пешвои миллат муҳтарам Эмомалӣ Раҳмон доираи фаъолиятро васеъ намуда, барои зиёд намудани ҳаҷми истеҳсол, номгӯи маҳсулот ва таъсиси ҷойҳои нави корӣ тадбирҳои зарурӣ меандешанд.

Бино ба маълумоти мутахассисон иқтидори истеҳсолии корхонаи нави равғанбарорӣ то 200 тонна равған дар як шабонарӯз буда, он метавонад то 50 дарсади талаботи бозори дохилиро бо ин намуди маҳсулот таъмин намояд.

Масъулони ҶДММ «ММК Агро» тасмим доранд, ки ҷиҳати таъмини иҷрои дастуру ҳидоятҳои Пешвои миллат муҳтарам Эмомалӣ Раҳмон масоҳати гармхонаи замонавиро зиёд намоянд. 

Гармхонаҳои ҶДММ «ММК Агро» аз ҷумлаи гармхонаҳои муосир ба шумор мераванд.

Зимни муаррифии лоиҳаи гармхонаи нави инноватсионӣ ба Раиси вилояти Суғд Раҷаб Аҳмадзода иттилоъ дода шуд, ки гармхона бо технологияҳои ҳозиразамон ва бо усул ҳолландӣ бунёд гардида, масоҳати он беш аз 6 гектар мебошад. Таҷҳизоти муосир, системаи идоракунии технологӣ ва усулҳои пешрафтаи парвариши зироат ба талаботи стандартҳои байналмилалӣ ҷавобгӯ буда, маҳсулоти ин гармхона дар баробари таъмини бозори дохилӣ барои содирот низ равона карда мешавад.

Дар толори хурди Мақомоти иҷроияи ҳокимияти давлатии вилояти Суғд бо иштироки масъулини соҳаи меъмориву шаҳрсозӣ, институтҳои лоиҳакашӣ, ҳифзи муҳити зист, кишоварзӣ, идораи замин ва дигар шахсони масъул машварати корӣ баргузор гардид. 

Дар оғоз Раиси вилояти Суғд Раҷаб Аҳмадзода иброз дошт, ки дар доираи сафари кории Пешвои миллат муҳтарам Эмомалӣ Раҳмон ба вилояти Суғд иншооти таъиноти гуногун мавриди баҳрабардорӣ қарор гирифт, ки дар баробари беҳтар шудани сатҳу сифати таълиму тарбия дар муассисаҳои соҳаи маориф, баланд бардоштани сатҳи хизматрасонии тиббӣ, ҳамзамон ҷойҳои нави корӣ фароҳам ва ҳаҷми истеҳсоли маҳсулоти саноативу кишоварзӣ афзун мегардад. 

Зимни ёдоварӣ аз дастуру супоришҳои Сарвари давлат муҳтарам Эмомалӣ Раҳмон таваҷҷуҳи масъулин ба масъалаҳои муҳим, аз ҷумла риояи талаботи меъмориву шаҳрсозӣ, истифодаи санъати миллии меъморӣ ҳангоми бунёди иншооти ҷашнӣ, эҳёи маҳаллаҳои таърихӣ дар шаҳрҳои Хуҷанд, Исфара, Истаравшан ва Панҷакент, вусъати корҳои ободониву созандагӣ ва дигар масъалаҳои ҳалталаб ҷалб карда шуд.