ТОҶИКОН-ОИНАИ ТАЪРИХИ МИЛЛАТ! – ҷавонон ва сокинони шаҳри Бӯстон иқдоми навбатии Пешвои миллатро ҷонибдорӣ менамоянд

Тавре маълум аст 7 июли соли 2022, амри Президенти Ҷумҳурии Тоҷикистон дар мавриди эълони озмуни ҷумҳуриявии ««Тоҷикон» - оинаи таърихи миллат» ба тасвиб расид. Озмуни ҷумҳуриявии ««Тоҷикон» – оинаи таърихи миллат» бо мақсади арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корномаҳои шоистаи ниёгони миллати тоҷик дар тули таърих, тақвияти ҳисси худогоҳӣ ва худшиносии миллӣ, ифтихори ватандорӣ, таҳкими ҳофизаи таърихӣ ва ба ин васила, шинохти нақши халқи куҳанбунёду фарҳангсолори тоҷик дар рушди тамаддуни инсоният, ки бо далелҳои раднопазир ва бо такя ба сарчашмаҳои илмию таърихӣ дар китоби мондагору пурарзиши академик Бобоҷон Ғафуров «Тоҷикон» ва дигар асарҳои таърихӣ инъикос ёфтааст, ба ифтихори 115-солагии академик Бобоҷон Ғафуров таҳти сарпарастии Президенти Ҷумҳурии Тоҷикистон дар соли 2023 доир мегардад.

Бо мақсади омодагӣ ба озмуни мазкур санаи 3 августи соли 2022 дар назди майдони Парчами давлатии шаҳр бо иштироки волонтёрон, ҷавонони фаъол ва омӯзгорону кормандони соҳаҳои мухталиф аксияи ҷавонон таҳти унвони “ТОҶИКОН-ОИНАИ ТАЪРИХИ МИЛЛАТ” доир гардид. Дар ин аксия оид ба аҳамияти таърихии асари безаволи “Тоҷикон”-и Қаҳрамони Тоҷикистон, академик Бобоҷон Ғафуров ва шартҳои озмуни ҷумҳуриявии ««Тоҷикон» - оинаи таърихи миллат» иттилоъ дода шуд. Дар фазои кушод иштирокдорони аксия тоҷиконхонӣ намуда, байни ҳам оид ба саволҳои пешниҳодгардидаи озмун мубодидаи афкор намуданд.

Қадршиносии ғолибони озмунҳо дар Панҷакент

Дар толори муҳташами Кохи Лоиқи шаҳри Панҷакент маросими қадршиносии ғолибони даври шаҳрии озмунҳои ҷумҳуриявии “Фурӯғи субҳи доноӣ китоб аст”, “Тоҷикистон – Ватани азизи ман”, озмуни шаҳрии “Донандаи беҳтарини китоби “Тоҷикон”-и академик Бобоҷон Ғафуров доир гардид.

Дар чорабинӣ муовини раиси шаҳр Парвина Нақибӣ зикр намуд, ки маҳз бо дастгирӣ ва пуштибонии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар даврони истиқлол мо  имкон пайдо намудем, ки ба таъриху фарҳанги оламшумули худ,  кору пайкори абармардони илму адабамон шоиста арҷгузорӣ намоем, ба мутолиаи китоб, ки меҳвари донишандӯзӣ аст, бо баргузории озмунҳо таваҷҷӯҳи наврасону ҷавононро ҷалб созем, истеъдодҳои навро кашф намоем.

Хонандагони тоҷик барои иштирок дар олимпиадаи байналмиллалӣ ба Лондон сафар карданд

11 нафар хонандагони МДТ "Литсей барои хонандагони болаёқат" дар шаҳри Хуҷанд ҷиҳати иштирок дар олимпиадаи байналмиллалӣ аз фанни забони англисӣ ба шаҳри Лондони кишвари Британияи Кабир сафар карданд.

Баҳромзода Муҳаммадхон Фирдавс, Қобилов Исфандиёр, Нарзуллоев Шукрулло, Мирфаёз Беҳрӯз, Искандаров Искандархоҷа, Шодмонов Шерозхуҷа, Аҳророва Ясмина, Ҳайдарзода Рамазон, Ҷабборова Дилбарҷон, Абдуллоева Фирӯза ва Мирзохоҷаев Бузрукхоҷа дар 2 даври олимпиадаи мазкур, ки моҳҳои феврал - майи соли ҷорӣ тариқи фосилавӣ баргузор гардид, ғолиб омада ба даври Гранд-финали ин Олимпиадаи бонуфузи байналмилалӣ, роҳхат ба даст оварданд.