Хабарҳо
Дар Конибодом ба бунёди боғи нави зардолу оғоз бахшида шуд - 26.02.2021 17:26
Боздиди Раиси вилоят Раҷаббой Аҳмадзода аз шаҳри Конибодом - 26.02.2021 17:02
Дар Китобхонаи вилоятии оммавии ба номи Тошхоҷа Асирӣ толори «Фурӯғи субҳи доноӣ китоб аст» таъсис ёфт - 26.02.2021 14:06
100 нафар ғолибони озмунҳои вилоятӣ қадршиносӣ гардиданд - 26.02.2021 11:08
Дар Гулистон таҳти унвони «Саҳми занон дар таҳкими Истиқлоли давлатӣ» маҳфили илмӣ-адабӣ доир шуд - 26.02.2021 11:06
Шиносоии Раиси вилоят Раҷаббой Аҳмадзода бо фаъолияти гармхонаҳо - 26.02.2021 10:16
Фармони Президенти Ҷумҳурии Тоҷикистон дар бораи зиёд намудани андозаи стипендияи донишҷӯёни муассисаҳои таҳсилоти олии касбӣ ва миёнаи касбии Ҷумҳурии Тоҷикистон, инчунин магистр, аспирант ва докторантҳо - 26.02.2021 09:10
Баҳри пешгирии таъсири сардӣ ба боғот бо тавсияи мутахассисон тадбирҳои зарурӣ амалӣ карда мешаванд - 26.02.2021 09:57
Раиси вилоят Раҷаббой Аҳмадзода Иброҳим Абдураҳмонов ва Севинч Аслоноваро аёдат кард - 24.02.2021 11:41
Боздиди Раиси вилоят аз хоҷагиҳои деҳқонии “Ӯткир” ва “Маърифат”-и ноҳияи Спитамен - 24.02.2021 11:27

Навиди Суғд


Хуҷанд. Ғолибони даври шаҳрии озмуни “Дастархонороӣ” муайян гардиданд

( 1 Овоз )

Дар тарабхонаи “Мирзоҳабиб”-и шаҳри Хуҷанд даври шаҳрии озмуни “Дастархонороӣ”  бо иштироки 22 маҳаллаҳои шаҳри Хуҷанд ташкил ва гузаронида шуд.

Ҳар як маҳаллаҳои шаҳр намунаи хўроку анвои хўрдании хешро бо санъату маҳорати хоса ба маърази тамошо гузоштанд.

Ҷоиз ба зикр аст, ки миллати тоҷик яке аз қадимтарин мардумони минтақаи Осиёи Марказӣ буда, дар ташаккули тамаддуни ҷаҳонӣ бо мероси бои фарҳангии моддӣ ва ғайримоддӣ мақоми шоиста касб намудааст. Халқи тоҷик на танҳо дар бахши омодасозии анвои таъомҳои миллӣ, балки дар дастархонороӣ низ маҳорати баланд дошта, хони оростаи ҳунармандони он на фақат маъракаҳои хонаводагӣ, балки ҷашнҳои пуршукӯҳи идонаи миллиро зебу зиннати хоса мебахшад.

Ҳайати ҳакамон баъди азназаргузаронӣ ва хулосаҳои худ ғолибонро муайян намуданд. Доварони озмун бештар ба сарфакоронаю моҳирона оростани дастархон, зебо, хушоянд, дилписанд будани он бо риояи анъанаҳои суннатӣ ва таомҳои миллӣ баҳогузорӣ намуда, маҳз камхарҷии онро ба инобат гирифтанд.

Ҳамин  тавр, мақоми аввалро маҳаллаи “Сирдарё”, ҷойи дуюмро  мактаби санъати №4 ва зинаи сеюмро маҳаллаи “Навбаҳор”-и шаҳр соҳиб гардиданд. Ба ғолибони озмун диплом ва туҳфаҳои хотиравӣ супорида шуд.

Хадамоти матбуоти
Раиси вилояти Суғд

Таҷлили Иди Сада дар ноҳияи Ҷаббор Расулов

( 0 Овоз )

29 январи соли 2021 дар маркази ноҳияи Ҷаббор Расулов бо иштироки кишоварзону фаъолон ва кормандони сохторҳои гуногуни ноҳия ҷашни Сада таҷлил гардид.

«БЕШАРАФӢ». Удабою уламои зери тоқӣ чӣ мегӯянд?

( 0 Овоз )

Муҳаммадиқбол. Қаҳрамони марказии филми «Бешарафӣ». Тамошои он чун ченаки чаҳорандоза майдонҳои дученакаи беохирро пеши назар ҷилва медиҳад. Баҳору хазони майдон марбут ба ҷаҳони маънавӣ, дарки тамошобин аст. Ӯ ё тараҳҳум бар ҳоли қаҳрамон мекунад ё зарбулмасали «Дарди бад давои бад»-ро вирди забон месозад. Дар оғози филм омадани унвони «Фоҷиаи миллӣ» холӣ аз маънӣ нест. Зеро фоҷиаи як фард фоҷиаи миллатест, ки фард аз он эътибор мегирад. Муҳим нест, ки фард фоҷиаи худро дарк кунад (чӣ хубе агар дарк кунад), муҳим дарси ибрат бардоштан, боздоштани тӯда аз ғалтидан ба чоҳи ғафлат аст. Мундариҷаи филм, ҳокӣ аз аз он аст, ки муаллифон, аз ҷумла, чунин ҳадафро ба миён гузоштаанд.

Дар филм мафҳуми тараҳҳум сарфи назар шудааст. Дидаю дониста. Зеро “Тараҳҳум бар паланги тездандон, ситамкорӣ бувад бар гӯсфандон” аст. Ба хотири кайк пӯстин сӯхтан аст. Хоса даме, ки сухан аз бақо ё адами ҳастии миллат, давлат меравад. Хатти маши филмро ин нукта дар бар мегирад. Персонажҳое, ки дар бораи каҳрамони филм ибрози андеша мекунанд, шахсони одӣ нестанд. Сухани онҳо вазн, эътибор дорад, шоҳиди зинаҳои «камолот»-и қаҳрамон ҳастанд. Онҳо на ба он хотир ибрози андеша мекунанд, ки хусумате, танафуре ба шахсе доранд, балки шаҳди каҷ пой ниҳоданҳоро ба ҷони хеш санҷидаанд. Онҳо аз оқибати каҷ хишт ниҳоданҳо меҳаросанд, ки сухан ботаҳаммул, вале бепарда мегӯянд.

Агар дидӣ, ки нобиною чоҳ аст,
Ту гар хомӯш биншинӣ гуноҳ аст!

Оғози филм «Фоҷиаи миллат» ном гирифтааст. Оё метавонист ин фоҷиа бар сари Муҳаммадиқбол, ки фоҷиаи миллат аст, рух надиҳад? Метавонист. Агар ин бачаи деҳотӣ аз оғӯши гарми дабистон канда намегашт, аз ҷамъ-ул- ҷамоат бо ҳидояти қиблагоҳ ба ҷамоате, гурӯҳи фирефтаи пулу моли аҷнабиён намепайваст, ба доми балои кишвари касофатзада намеафтод. Ин ҳам кам аст. Тоҷикон дар мавриди инсони бемавқеъ «Ин одам мазҳаб надорад»  мегӯянд. Яъне, мавқеъ надорад. Ин гуфта ба миллат ҳам тааллуқ дорад.

Миллати бемазҳаб, маънӣ бемавқеъ. Замоне, ки афроди як миллат бар алайҳи ҳамдигар дар сангарҳо қарор доранд, дар бораи миллият ҳарф задан бо чормағзи пуч кисса пур кардан аст. Худфиребист. Замоне, ки кори миллат бар дӯши ду — се нафар бор аст, дигарон худро канор мегиранд, аз бақои он ҳарф задан душвор аст. Маъмур будан маънии масъул буданро надорад. Мухолиф будан маънии дар мавқеи миллат буданро надорад. Мунофиқон, ки сари дастархон, яке аз минбар дигаре мегӯянд, замину замонро гирифтаанд. Онхо об лой мекунанду моҳӣ меқапанд, фитна меангезанду шикам мечалонанд. Ин аст, ки миллати тоҷик ибтидои асри XX ҳар чӣ дошт, аз даст дод. Ин аст, ки миллати тоҷик ибтидои асри XXI хар чӣ ӯ дошт, аз даст дод.

Вале дарс нашуд. Гумон аст, ки мағзи чапи фалаҷ имкон диҳад, ки дарс шавад. Даме, ки миллатҳои дигар роҳи баҳам омадан меҷӯянд, афроди тоҷик сояи ҳамдигар аз девор метарошанд. Ҳадафи филм Муҳаммадиқбол нест, баргардонидани афроди миллат аз ин роҳи ғалат аст. Фикр мекунам, удабою уламои зери тоқӣ ба ин гуфта розӣ ҳастанд. Агар розӣ нестанд, чӣ ҳарфи гуфтанӣ доранд?

Албатта шарм аст, ки тоҷике ба ҷаҳониён ба сурати қаҳрамони марказии «Бешарафӣ» муаррифӣ шавад. Аммо шарми бештар аз он аст, ки ин тоҷик ҷойгоҳи худро надорад, сарнавишти талхи миллат барояш дарс нест. Сарнавишт (карма) подоши пиндор, гуфтор, кирдор аст. Он метавонад нек бошад ё бад. Он ки қаҳрамони филм сониро касб кардааст, тӯдаро ба каҷроҳа ҳидоят мекунад, ҳадафи тири хаданги нишонраси муаллифон қарор гирифтааст. Қаҳрамон он чиро, ки дар симои дигарон меҷуст, дар рӯзгори худ пайдо кард. Лаҳни гуфтореро, ки ба дигарон раво дид, аксулсадояшро шунид. Афсонаеро, ки мехонад, ба хакиқати зиндагиаш табдил ёфт.

Хишт ҳамонест, ки лояш аст.

Хислати «хубе» дорем мо тоҷикон тамошобинему балегӯй. Даме, ки  кор аз кор гузашт, гунаҳгор меҷӯем. Шиорамон «Дил ба ёру даст ба кор» не, «Таваккал бар сари кал». Адабиёт, фарҳанги ҳазорсола назди удабои мо чормағзи пуче беш нест. Агар чунин нест, чаро онҳо ба кирми лойхӯраки даруни кӯза мубаддал гаштаанд? Ба чоҳ меафтему боз меафтем. Мисли оне, ки мағзи чапи сарамон фалаҷ аст. Нотавонбенему тавони тавоноро надорем. То қасд нагирем, тасбамон паст намешавад. Зархаридони ҳалқабаргӯшем. Гуноҳе содир мекунему худро мусичаи бегуноҳ мегирем.

Як дӯстам чунин гуфт: «Муҳаммадиқбол ба чоҳе афтод, ки худ канда буд». «Кадом аст он чоҳ» — пурсидам аз ӯ. «Ривоятбофию ривоятсозӣ. Маслаки ҳазорсолае, ки аз ҳақиқати зиндагӣ дур месозад».

Афсӯс, ки қаҳрамони филм масали маъмули «Аввал саратро ба халтаи худ андоз»-ро фаромӯш кардааст. Аҷаб мушоҳидакору пурҳикмат буданд ниёгони мо. Манзур аз ин масал бӯи дохили халта аст. Афсӯс, халтаи Муҳаммадиқбол ҳар бӯе, ки дошт, ба машоми мардум расид. Дар Аврупо шояд он бӯи настаран бошад, аммо дар Тоҷикистон чӣ бӯи баде!

Бо ҳамкасбон сари «Бешарафй» зиёд суҳбат меороем. Андешаҳо якранг нестанд. Аммо аксари онҳое, ки аз касбият бӯй бурдаанд, мутмаин бар масали «Дарди бадро давои бад» ҳастанд.

Ҳар бад, ки ба худ намеписандӣ,
Бо кас макун ай бародари ман!
Гар модари хеш дӯст дорӣ,
Дашном мадеҳ ба модари ман!

Шарифи ҲАМДАМПУР

Бознашр аз ҳафтаномаи «Тоҷикистон» №4 (1411) 2021


Хонандаи тоҷик Лайло Ёқубова дар Фестивали байналмилалии «Шодии Тошканд» ғолиб гардид

( 0 Овоз )

Хонандаи синфи 7 муассисаи таҳсилоти миёнаи умумии №11-и ноҳияи Ҷаббор Расулов, узви маҳфили «Рассоми эҷодкор»- и Маркази таҳсилоти иловагӣ Лайло Ёқубова дар 8 — умин Фестивали байналмилалии «Шодии Тошканд» иштирок намуда, ғолиб гардид. Дар ин бора Фирдавс Ашӯрматов, роҳбари Маркази таҳсилоти иловагии вилояти Суғд хабар дод.

Лайло Ёқубова таҳти роҳбарии Нозима Раҳимбоева ба кумитаи тадорукот озмуни мазкур, ки тариқи фосилавӣ баргузор гардид, расмҳои кашидаашро дар мавзӯъҳои «Олами рангини кӯдакон», «Ҷаҳоне, ки ман сукунат дорам», «Ватани ман», «Орзуи ман» пешниҳод намуд.

Фестивали байналмилалии кӯдакон «Шодии Тошканд» аз соли 2004 инҷониб аз ҷониби Академияи рассомии Ҷумҳурии Ӯзбекистон дар ҳамкорӣ бо Вазорати фарҳанг ва корҳои хориҷии Ҷумҳурии Ӯзбекистон дар ду сол як маротиба байни кӯдакони аз 5 то 15-сола баргузор мегардад. Имсол ба кумитаи тадорукоти 8 — умин Фестивали байналмилалии «Шодии Тошканд» зиёда аз 2 ҳазор асарҳои кӯдакон аз 27 кишвари олам, аз ҷумла Франсия, Ҳиндустон, Чин, Амрико, Озарбойҷон, Малайзия, Миср, Қазоқистон, Ӯзбекистон, Исроил, Тоҷикистон, Федератсияи Россия, Латвия ва ғайра пешниҳод гардиданд.

Асарҳои тасвирнамудаи Лайло Ёкубова дар намоишгоҳи доимии 8 — умин Фестивали байналмиллалии «Шодии Тошканд» ба намоиш гузошта мешаванд.

Хадамоти матбуоти
Раиси вилояти Суғд

Фаъолият ҷамъбаст ва вазифаҳо муайян гардиданд

( 0 Овоз )

Дар  маҷлисгоҳи  Гимназияи №1  ба номи  Раҳим  Ҷалили маркази вилоят   бо иштироки сардорони раёсат, мудирони шуъбаҳои маориф, директорони Марказҳои дарёфт ва рушди истеъдодҳо, технологияи иттилоотӣ ва коммуникатсионӣ, таҳсилоти иловагӣ, кабинетҳои методии шаҳру ноҳияҳо ҷаласаи ҳайати мушовара оид ба ҷамъбасти фаъолияти Раёсати маорифи вилоят дар соли 2020 ва вазифаҳо барои соли 2021 баргузор гардид.

Ҷаласаро сардори Раёсати маорифи вилоят Осим Каримзода ифтитоҳ намуда, бардоштҳои хешро аз ҷаласаи ҷамъбастии фаъолияти хоҷагии халқи вилоят  оид ба натиҷаҳои  соли сипаригардида баён дошта, ҳозиринро бо рӯзномаи кори ҷаласа ошно кард. Сипас ҳисоботи Раёсати маорифи вилоят дар соли 2020 шунида шуда,  вазифаҳо барои соли равон муқаррар гардиданд.

Зимни музокира сардорони раёсат ва мудирони шуъбаи маорифи шаҳру навоҳии Истаравшан Диловар Азимов, Исфара Бобохон Саидов, Панҷакент Алишер Мутрибов,   Гулистон  Нурмуҳаммад  Мирзоев, Деваштич Ботур Расулов оид ба натиҷаҳои фаъолият дар соли сипаришуда андешаҳо баён доштанд.  Сардори Раёсати маорифи вилоят Осим Каримзода ҷиҳати ислоҳи камбудӣ ва боз ҳам пешрав гардидани фаъолияти маорифчиёни шаҳру ноҳияҳои зикршуда дастуру супоришҳои мушаххас дод.

Корманди масъули Прокуратураи вилоят Донохон Ҷӯраева аз натиҷаҳои санҷиши прокурорӣ дар мавриди дафтардорӣ, таъмини иҷроиши санадҳои меъёрию ҳуқуқӣ, ба танзим даровардани маблағгузории сарикасӣ, роҳ надодан ба таъиноти шахсони масъули молиявӣ дар муассисаҳои таълимӣ аз ҳисоби хешовандони наздик ва ғайра гузориши муфассал ироа дошт.

Сипас, нақшаи кории Раёсати маорифи вилоят барои нимсолаи аввали соли 2021 аз ҷониби ҳозирин тасдиқ гардида, оид ба натиҷаҳои рӯзҳои Раёсати маорифи вилоят, санҷиши сатҳу сифати таҳсилот ва рафти иҷрои қарори Ҳукумати Ҷумҳурии Тоҷикистон аз 29 октябри соли 2017, №544 «Дар бораи Барномаи давлатии таъмини муассисаҳои таҳсилоти умумии ҷумҳурӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2018-2020»  дар муассисаҳои таълимии ноҳияи Ҷаббор Расулов, рафти баргузории аттестатсияи кормандони соҳаи маорифи ноҳияҳои Зафаробод, Ҷаббор Расулов ва Мастчоҳ сармутахассиси шуъбаи кадрҳо ва корҳои махсуси Раёсати маорифи вилоят Сафия Каримова ибрози андеша намуд.

Оид ба  масъалаҳои баррасишуда ва баланд бардоштани сифати таълиму тарбия, пешгирии зуҳуроти номатлуб, иҷроиши саривақтии дастуру супоришҳои ироагардида сардори Раёсати маорифи вилоят Осим Каримзода ба масъулин дастуру супоришҳо дод.

Дар хотимаи ҷаласа оид ба масъалаҳои баррасишуда қарорҳои дахлдор муҳокима ва қабул гардиданд.

Хадамоти матбуоти
Раиси вилояти Суғд

ШУМО ДАР: Навиди Суғд