Дар вилоят 938 муассисаи нигаҳдории тандурустии давлатӣ, аз ҷумла 135 муассисаи сохтори госпиталии давлатӣ ва 803 муассисаи сохтори КАТС, инчунин, 292 муассисаи тиббии хусусӣ, аз ҷумла 121 ҷамъияти дорои масъулияти маҳдуд бо 54 намояндагӣ ва 117 соҳибкори инфиродӣ фаъолият доранд.
Ба аҳолии вилоят 5078 табиб ва 17961 корманди миёнаи тиб хизмат расонида истодаанд.
Дар соли 2023 сохтмон ва таъмиру азнавсозии 138 иншооти соҳа, аз ҷумла бунёди 32 иншоот ва таъмиру азнавсозии 106 иншоот ба нақша гирифта шуда, дар се моҳи соли ҷорӣ таъмири кулли Маркази саломатии Зарафшони Ҷамоати деҳоти А. Ҷомии ноҳияи Зафаробод ва Маркази саломатии деҳаи Навбунёди Ҷамоати деҳоти Гулхонаи ноҳияи Ҷаббор Расулов ба итмом расида, корҳои сохтмону таъмир дар 16 иншооти шаҳру ноҳияҳои Гулистон, Истаравшан, Исфара, Конибодом, Панҷакент, Хуҷанд, Айнӣ, Ашт, Ҷаббор Расулов, Зафаробод ва Шаҳристон идома дорад.
Бо мақсади беҳтар намудани таъминнокии муассисаҳои тиббӣ бо лавозимоту таҷҳизоти тиббӣ аз ҳисоби ҳамаи сарчашмаҳо 47 адад таҷҳизот ба маблағи 2,3 млн. сомонӣ харидорӣ ва ба муассисаҳои тиббӣ дастрас гардидааст.
