Раиси вилояти Суғд Раҷаббой Аҳмадзода дар ноҳияи Зафаробод бо фаъолияти ҶДММ «Ҷахида» шинос гардид. Самти асосии фаъолияти фермаи инноватсионӣ ин парвариши чорвои хурди шохдор ва истеҳсоли маҳсулоти ширӣ аз қабили панир, шир ва ҷурғот ба ҳисоб меравад. Айни замон дар ин ферма 147 сар буз парвариш карда мешавад, ки 90 сари он ширдеҳ мебошад.

Дар як шабонарӯз то 70-80 литр шир гирифта шуда, давоми як моҳ то 150-200 кг панир ва 800 литр ширу ҷурғот истеҳсол карда мешавад. Барои ин тамоми имконот ва дастгоҳи мавҷуда муҳайё гардидааст. Фермаи мазкур бо навтарин таҷҳизот муҷаҳҳаз буда, масъулин азм доранд дар оянда саршумори чорворо зиёд гардонанд.

Маҳсулоти истеҳсолгардида дар бозорҳои вилоят ва кишвар ба фурӯш бароварда мешавад ва аз лиҳози табиӣ тоза буда, ба саломатии инсон манфиати бештар дорад. Дар умум, дар хоҷагиҳои минтақа бо дастгирии ин фермаи инноватсионӣ саршумори чорвои хурди шохдор, яъне бузҳои зотӣ то ба 300 сар расонида шудааст.

11 октябр ҷаласаи ҳайати мушовараи Сарраёсати Вазорати молияи Ҷумҳурии Тоҷикистон дар вилояти Суғд баргузор гардид.

Дар ҷаласаи ҳайати мушовараи Сарраёсати Вазорати молияи Ҷумҳурии Тоҷикистон дар вилояти Суғд натиҷаи фаъолият ва иҷрои нишондиҳандаҳои буҷети вилоятро дар нўҳ моҳи соли 2023 баррасӣ намуданд.

Гуфта шуд, ки тибқи маълумоти омори давлатӣ дар ҷамъбасти нўҳ моҳи соли 2023 нишондиҳандаи кўтоҳмуҳлати рушди вилоят ба 24472,7 млн. сомонӣ ва суръати афзоиши он ба 108,2 фоиз баробар гардида, саҳми он дар маҷмўи маҳсулоти дохилии кишвар 27,2 фоизро ташкил додааст.

Инчунин, рушди нишондиҳандаи мазкур дар ин давра асосан аз ҳисоби афзоиши ҳаҷми маҳсулоти саноатӣ 107,5 фоиз, кишоварзӣ 101,7 фоиз, гардиши савдои чакана 109,4 фоиз, хизматрасониҳои пулакӣ 103,6 фоиз, маблағгузорӣ ба сармояи асосӣ 127,7 фоиз ва ғайра таъмин гардид.