Паёми табрикии Раиси вилоят бахшида ба Рӯзи шаҳри Хуҷанд

Сокинони сарбаланди шаҳри бостонии Хуҷандро ба муносибати Рӯзи шаҳри Хуҷанд самимона табрик менамоям.

Хуҷанд, ки яке аз шаҳрҳои қадимӣ ва марказҳои муҳими таърихиву фарҳангии тоҷикон маҳсуб меёбад, дар даврони соҳибистиқлолӣ бо шарофати сиёсати оқилона ва созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сол ба сол ободу зебо ва пешрафта гардида истодааст.
Таваҷҷуҳи пайвастаи Пешвои миллат муҳтарам Эмомалӣ Раҳмон ба рушди шаҳр ва фароҳам овардани шароити арзандаи зиндагӣ барои мардум барои вусъати корҳои созандагиву бунёдкорӣ дар Хуҷанд заминаи мусоид фароҳам овардааст.
Ба муносибати 35-солагии Истиқлоли давлатии Ҷумҳурии Тоҷикистон дар чанд соли охир дар шаҳри Хуҷанд беш аз 1200 иншооти таъиноти гуногун ба истифода дода шуда, иншооти нав ба боз ҳам ободу зебо гардидани симои шаҳр ва беҳтар шудани сатҳи хизматрасониҳо мусоидат намуданд.
Имрӯз Хуҷанд бо иқтидори иқтисодӣ, саноатӣ, илмӣ, фарҳангӣ ва сайёҳии худ дар қатори шаҳрҳои рушдкардаи ҷумҳурӣ қарор дошта, дар пешрафти иқтисодиву иҷтимоии мамлакат саҳми арзанда мегузорад.
Мардумони меҳнатдӯсту фарҳангпарвари Хуҷанди бостонӣ бо ҳисси баланди масъулият дар корҳои ободониву созандагӣ саҳм гузошта, барои рушди Тоҷикистони соҳибистиқлол талош менамоянд.
Боварии комил дорам, ки бо меҳнати содиқонаи сокинон шаҳри Хуҷанд минбаъд низ ободу зебо гардида, ба шаҳри боз ҳам зебо, пешрафта ва муосир табдил хоҳад ёфт.
Рӯзи шаҳри Хуҷандро ба ҳамаи сокинон ва меҳмонони шаҳр самимона табрик гуфта, ба ҳар яки онҳо саломатӣ, хушбахтӣ, файзу баракат ва рӯзгори осуда орзу менамоям.
Рӯзи шаҳри Хуҷанд муборак бод!