Рӯзи 24 октябр Раиси вилояти Суғд Раҷаббой Аҳмадзода ба шаҳри Конибодом сафари корӣ анҷом дод.

Дар шаҳри Конибодом ба истиқболи 35-солагии Истиқлоли давлатии Ҷумҳурии Тоҷикистон корҳои созандагиву ободонӣ тибқи нақша идома дорад. Дар баробари бунёди иншооти таъиноташ гуногун сохтмони муассисаҳои соҳаи маориф низ идома дошта, роҳбари вилоят сохтмони муассисаҳои томактабии рақами 1 ва 2-и шаҳрро мавриди таваҷҷуҳ қарор дод.

Чуноне маълумот дода шуд, баъди ба истифода додани кӯдакистони рақами 1 то 150 нафар ва дар кӯдакистони рақами 2 бошад 250 нафар кӯдакон ба таълиму тарбия фаро гирифта мешаванд.

Раиси вилоят бунёди муассисаҳои томактабиро амри зарурӣ ва талаботи рӯз арзёбӣ карда, барои бо сифати баланд ба итмом расонидани корҳои сохтмонӣ ба роҳбарияти шаҳр ва масъулини соҳаи сохтмон супоришҳо дод.

22 сентябр дар деҳаи Ярми деҳоти Лангари ноҳияи Куҳистони Мастчоҳ бо иштироки Раиси вилояти Суғд Раҷаббой Аҳмадзода​ бинои муассисаи таҳсилоти миёнаи умумии рақами 30 ба истифода дода шуд.

Иттилоъ дода шуд, ки дар бинои қаблии муассиса шароити таълиму тарбия ба талаботи рӯз ҷавобгӯ набуд ва бо бунёди бинои нав хонандагон дар бинои наву замонавӣ ба донишандӯзӣ машғул мешаванд. Дар замони соҳибистиқлолӣ ба рушди соҳаи маориф, ки соҳаи калидӣ эътироф шудааст, таваҷҷуҳи хоса равона шуд ва дар натиҷа ҳазорҳо иншооти замонавӣ бунёд гардид, ки ба пешрафти кори таълиму тарбия замина фароҳам овард.

Зимни суҳбат бо хонандагону омӯзгорони муассиса Раиси вилоят​ иброз дошт, ки бо истифода аз шароити мавҷуда илму ҳунар омӯзанд, то дар зиндагӣ муваффақ шаванд. Ҳукумати Ҷумҳурии Тоҷикистон ба ҷавонон ҳамчун ояндаи давлату миллат ҳамеша такя мекунад ва барои босавод ба камол расидани онҳо шароити муосид фароҳам овардааст.

29 май Раиси вилояти Суғд Раҷаббой Аҳмадзода ба ноҳияи Мастчоҳ сафар намуда, бо ҷараёни бунёдкориҳо шинос гардид.

Раиси вилоят нахуст аз ҶСП "Арвис Зелал текстайлз" боздид карда, рафти корҳои омодагӣ ва васлу насби таҷҳизот дар фабрикаи ресандагиро мавриди таваҷҷуҳ қарор дод. Ҳоло дар корхона ба таври таҷрибавӣ истеҳсолот ба роҳ монда шуда, беш аз 200 нафар занону духтарон нозукиҳои корро омӯхта истодаанд. Бо пурра омода шудани корхона то 500 нафар соҳиби ҷойи корӣ ва маоши хуб мегарданд.

Бояд тазаккур дод, ки фаъолияти фабрикаи ресандагӣ бо саҳмгузории соҳибкорони тоҷику турк охири соли гузашта азсар кор гирифта шуда, таҷҳизоту технологияҳои зарурӣ ворид карда шудааст.

Боғдорони шаҳри Конибодом ба ҷамъоварӣ ва содироти навъи пешпазаки зардолу оғоз бахшида, то имрӯз беш аз 500 тонна зардолу содирот намуданд. Дар ин бора зимни боздиди Раиси вилояти Суғд Раҷаббой Аҳмадзода аз шаҳри Конибодом иттилоъ дода шуд.

Раиси вилоят дар шаҳри Конибодом бо рафти ҷамъоварӣ, банду баст ва​ содироти зардолу шинос гардида, барои пурра ҷамъоварӣ намудани ҳосил ба масъулину боғдорон тавсияҳо дод. Тавре иттилоъ дода шуд, дар Конибодом 12 ҳазор гектар боғи зардолу мавҷуд буда, ҳосили интизорӣ дар соли равон 30 ҳазор тоннаро ташкил мекунад. Боғдорон имрӯзҳо навъҳои пешпазаки зардолуро чида, ба кишварҳои Россия ва Қазоқистон содирот намуда истодаанд. Аз ҷониби соҳибкорон сардхонаҳои замонавӣ ташкил гардида, меваи чидашуда пас аз банду баст содирот карда мешавад. Нархи як килограм зардолу вобаста ба навъу сифат аз 2-3 то 8 сомонӣ буда, боғдорон аз ин ҳисоб даромади хуб мегиранд.

11 май Раиси вилояти Суғд Раҷаббой Аҳмадзода ба ноҳияи Айнӣ сафари корӣ анҷом дода, бо ҷараёни кишти зироатҳо,​ тарзи истифодабарии замин ва бунёдкориҳо дар ноҳия шинос гардид.

Дар Ҷамоати деҳоти Рарз роҳбари вилоят фаъолияти хоҷагиҳои деҳқонӣ ва маданияти заминистифодабарии сокинонро мавриди таваҷҷуҳ қарор дод. Мусаллам аст, ки истифодаи оқилонаи замин омили асосии рушди соҳаи кишоварзӣ ва таъмини аҳолӣ бо маводи ғизоӣ буда, дар ноҳияи Айнӣ ҷиҳати иҷрои дастуру ҳидоятҳои Пешвои миллат муҳтарам Эмомалӣ Раҳмон ҳар порча замин самаранок истифода мегардад. Сокинони ноҳия дар шароити куҳистон ҳар як ваҷаб заминро мақсадноку оқилона истифода бурда, зиндагии худро таъмин ва боқимондаи маҳсулотро ба фурӯш мегузоранд.

Ба истиқболи 35-солагии Истиқлоли давлатии Ҷумҳурии Тоҷикистон дар Ҷамоати деҳоти Овчӣ-Қалъачаи ноҳияи Бобоҷон Ғафуров сохтмони як қатор иншооти гуногун идома дорад.

Раиси вилояти Суғд Раҷаббой Аҳмадзода бо ҷараёни бунёдкориҳо дар ҷамоат шинос гардида, барои тақвиятбахшии корҳои сохтмонӣ, сарсабзу хуррамгардонии кӯчаву хиёбонҳо ва чароғонкунии ҷойҳои ҷамъиятӣ ба роҳбарияти ноҳия супоришҳо дод.