Дар доираи омодагиҳо ба истиқболи ҷашни 35-солагии Истиқлоли давлатии Ҷумҳурии Тоҷикистон дар Ҷамоати деҳоти Сабристони шаҳри Истаравшан бо иштироки Раиси вилояти Суғд Раҷаб Аҳмадзода ба корҳои мумфаршкунии роҳи мошингарди деҳаи Яккатол оғоз бахшида шуд.

Мумфарш гардидани роҳ, ки аз орзуҳои деринаи сокинон маҳсуб меёбад, бо дастгирии мақомоти иҷроияи ҳокимияти давлатии шаҳр ва саҳми фаъолонаи соҳибкорон ва аҳолии ободкор амалӣ мегардад. 

Дар ҷараёни сафари корӣ иттилоъ дода шуд, ки дар Сабристон бо ташаббуси соҳибкорони маҳаллӣ ва бо мақсади иҷрои супоришҳои Пешвои миллат муҳтарам Эмомалӣ Раҳмон кӯдакистони хусусӣ бунёд ва ба истифода дода мешавад. Ин иншооти иҷтимоӣ имкон фароҳам меорад, ки кӯдакон ба тарбия фаро гирифта шаванд. 

Дар доираи сафари корӣ ба шаҳри Истаравшан 5 сентябр Раиси вилояти Суғд Раҷаб Аҳмадзода бо ҷараёни корҳои ободониву созандагӣ, ки ба истиқболи ҷашни пуршукӯҳи 35-солагии Истиқлоли давлатии Ҷумҳурии Тоҷикистон вусъат ёфтаанд, аз наздик шинос шуд.

Дар шаҳри Истаравшан бо ташаббуси мақомоти давлатӣ ва саҳми соҳибкорони ватанӣ бунёди даҳҳо иншооти таъиноташон гуногун идома доранд. 

Яке аз иншооти ҷашнӣ маркази ташхисию табобатии хусусӣ мебошад, ки бо саҳми соҳибкор Машҳура Ҳайдарова бунёд мегардад. Ин марказ бо таҷҳизоти муосири тиббӣ таъмин шуда, имкони пешниҳоди хизматрасониҳои баландсифати тиббиро барои аҳолӣ фароҳам меорад. Раиси вилоят зимни боздид аз ҷараёни сохтмон масъулинро вазифадор намуд, ки ба сифати корҳои сохтмонӣ диққати махсус диҳанд, то иншоот дар муҳлати муайян ва бо сатҳи баланд ба истифода дода шавад.

Дар остонаи ҷашни 34-солагии Истиқлоли давлатии Ҷумҳурии Тоҷикистон дар шаҳри Истаравшан ба 65 нафар кормандони техникӣ ва мутахассисони ҷавон маводи хӯрока ва туҳфаҳои молӣ тақдим карда шуд.

Дар маросими тақдими туҳфаҳо Раиси вилояти Суғд Раҷаб Аҳмадзода иштирок намуда, иброз дошт, ки дар партави сиёсати хирадмандонаи Пешвои миллат муҳтарам Эмомалӣ Раҳмон, хизматҳои арзандаи ҳар як шахс, бахусус мутахассисони ҷавон, ҳамеша қадр карда мешаванд.

Роҳбари вилоят таъкид намуд, ки таъмини мутахассисони ҷавон бо манзили истиқоматӣ, ҷудо намудани қитъаи замин барои бунёди хона ва дигар тадбирҳои дастгиркунанда аз иқдомҳои шоистае мебошанд, ки барои ҳавасмандсозии онҳо равона шудаанд.

5 сентябр дар доираи сафари корӣ ба шаҳри Истаравшан Раиси вилояти Суғд Раҷаб Аҳмадзода бо ҷараёни корҳои созандагию ободонӣ, ки ба истиқболи ҷашни пуршукӯҳи 35-солагии Истиқлоли давлатии Ҷумҳурии Тоҷикистон идома доранд, аз наздик шинос гардид.

Нахуст роҳбари вилоят аз деҳаи Суфӣ Ориф боздид ба амал овард. Дар ин деҳа бо дастгирии соҳибкорони ватандӯст, аҳолӣ ва шахсони саховатпеша бинои иловагии муассисаи таҳсилоти миёнаи умумии №62 бунёд гардида истодааст. Айни ҳол корҳои сохтмонӣ дар марҳилаи анҷомёбӣ қарор дошта, ба гуфтаи масъулин, пас аз пурра ба итмом расидани сохтмон, бинои нав бо дастгирии Мақомоти иҷроияи ҳокимияти давлатии шаҳри Истаравшан пурра бо мебел ва дигар лавозимоти хониш таъмин карда мешавад.