Дар Боғи фарҳангию фароғатии “Истиқлол” -и шаҳри Конибодом аттраксионҳои нав ба истифода дода шуд.

Зимни баистифодадиҳии аттраксионҳои нав ва мулоқот бо собиқадорони меҳнат Раиси вилояти Суғд Раҷаббой Аҳмадзода зикр намуд, ки бо дастгириҳои пайваста ва иқдомҳои созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои ободониву созандагӣ дар саросари вилоят, аз ҷумла шаҳри Конибодом рӯз то рӯз вусъат меёбанд. Ҳадафи асосии ин тадбирҳо фароҳам овардани шароити шоиста барои сокинон ва таъмини рушди шаҳру деҳот мебошад.

Таҷдид ва навсозии боғи марказии шаҳр, ки имрӯз ба макони дилписанду фароғатии кӯдакон ва калонсолон мубаддал гардидааст, аз ҷумлаи чунин иқдомҳои созанда мебошад. Боғи мазкур масоҳати 1,7 гектарро дар бар гирифта, бо шароити муосир барои истироҳат, фароғат ва баргузории чорабиниҳои оммавӣ муҷаҳҳаз гардонида шудааст.

1 майи соли 2025 бо иштироки Раиси вилояти Суғд Раҷаббой Аҳмадзода дар ду деҳаи шаҳри Конибодом ду майдончаи варзишӣ ба истифода дода шуд.

Дар доираи сафари кории Раиси вилояти Суғд Раҷаббой Аҳмадзода ба шаҳру деҳоти Конибодом ду майдончаи варзишии муосир дар ҷамоатҳои Фирӯзоба ва Патар ба истифода дода шуд.

Майдончаи аввал дар назди муассисаи таҳсилоти миёнаи умумии №37, воқеъ дар деҳаи Ҳисораки ҷамоати Фирӯзоба, бо заҳмати аҳли деҳа ва дар руҳияи ҳамбастагӣ бунёд ёфтааст. Зимни ифтитоҳи он Раиси вилоят бо омӯзгорону хонандагон мулоқот анҷом дода, таъкид намуд, ки дар асоси сиёсати созандаи Пешвои миллат муҳтарам Эмомалӣ Раҳмон, бунёди иншооти иҷтимоӣ, аз ҷумла муассисаҳои соҳаи маориф, дар вилоят бо суръати баланд идома дорад. Танҳо дар чанд соли охир садҳо синфхона ва иншооти ёрирасон сохта шудааст.

Дар доираи сафари корӣ ба шаҳри Конибодом Раиси вилояти Суғд Раҷаббой Аҳмадзода аз ҳолу аҳволи собиқадорони меҳнат Деҳқонбой Ёрматов, Иқболой Ҳаитова ва Муҳаммадҷон Саримсоқов хабар гирифт.

Деҳқонбой Ёрматов, ки ба синни 95 расидааст, солҳои зиёд дар соҳаи кишоварзӣ фаъолият намуда, саҳми арзанда дар рушди соҳа гузоштааст. Иқболой Ҳаитова ҳамчун омӯзгори содиқ дар тарбияи насли наврас саҳми шоиста гузоштааст. Муҳаммадҷон Саримсоқов маъюби гурӯҳи якум буда, пайваста зери таваҷҷуҳу дастгириҳои давлату Ҳукумат қарор дорад.

Зимни мулоқот роҳбари вилоят таъкид намуд, ки барои фароҳамсозии шароити арзанда ба ҳар як шаҳрванди кишвар, хоса собиқадорони меҳнат, Ҳукумати Ҷумҳурии Тоҷикистон барномаҳои махсусро амалӣ намуда, дар маҳалҳо тадбирҳои мушаххас рӯйи кор меоянд. Тибқи супоришҳои Пешвои миллат муҳтарам Эмомалӣ Раҳмон ин табақаи аҳолӣ ҳамеша зери ғамхории давлат қарор дорад.

Дар бинои Кумитаи иҷроияи Ҳизби халқии демократии Тоҷикистон дар шаҳри Конибодом бо иштироки Раиси вилояти Суғд Раҷаббой Аҳмадзода ҷаласаи корӣ баргузор гардид.

Дар ҷаласа масъалаҳои муҳими фаъолияти мақомоти маҳаллӣ, раванди кишти баҳорӣ, вусъати корҳои ободониву созандагӣ ба ифтихори 35-солагии Истиқлоли давлатӣ ва зарурати риояи ҳатмии қонунҳои амалкунандаи кишвар мавриди таҳлилу баррасӣ қарор гирифтанд.

Раиси вилоят зимни баромад вазъи соҳаи кишоварзии шаҳрро мавриди таҳлил қарор дода, зарурати ҷонноксозии корҳо дар самти кишти пунбадонаро таъкид намуд. Тавре зикр гардид, кишти пахта дар муҳлатҳои оптималӣ заминаи устувор барои гирифтани ҳосили дилхоҳ аст. Аз ин рӯ, масъулини соҳа муваззаф гардиданд, ки корҳои саҳроиро бо суръати дучанд ба роҳ монанд ва барои иҷрои пурраи нақша тадбирҳои зарурӣ андешанд.