24 ноябр дар толори калони Мақомоти иҷроияи ҳокимияти давлатии вилояти Суғд таҳти раёсати Раиси вилоят Раҷаб Аҳмадзода ҷаласаи фаъолони соҳаи меъморӣ, сохтмон ва шаҳрсозӣ баргузор гардид.

Дар ҷаласаи корӣ муовинони Раиси вилоят, роҳбарони воҳиду сохторҳои вилоятӣ, раисони шаҳру ноҳияҳо, меъморону муҳандисон, масъулини бахши роҳсозӣ, замин, муҳити зист, назорати санитарию эпидемиологӣ, ҳолатҳои фақуллода, сӯхторнишонӣ, ширкатҳои сохтмонӣ, соҳибкорон, раисони ҷамоату деҳот ва дигар масъулин ширкат варзиданд. 

Ҷаласаи корӣ бо мақсади таъмини иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки санаи 19-уми ноябр дар шаҳри Гулистон баён гардида буд, баргузор гардида, дар он вазъи соҳаи меъмориву шаҳрсозӣ мавриди таҳлилу баррасӣ қарор дода шуд. 

Дар толори Мақомоти иҷроияи ҳокимияти давлатии вилояти Суғд муаррифии лоиҳаҳои иншооти дар шаҳру ноҳияҳои вилояти Суғд бунёдшаванда баргузор гардид . 

Масъулини шаҳру ноҳияҳо, институтҳои лоиҳакашӣ ва ширкатҳои сохтмонӣ нақшаву лоиҳаҳои иншооти мухталифро ба намоиш гузоштанд. 

Раиси вилояти Суғд Раҷаб Аҳмадзода зимни шиносоӣ бо лоиҳаҳои пешниҳодшуда таъкид дошт, ки бо шарофати истиқлоли давлатӣ ва дастгириҳои пайвастаи Пешвои миллат муҳтарам Эмомалӣ Раҳмон рушди ҳамаи бахшҳо, аз ҷумла сохтмон ва меъморӣ таъмин гардида истодааст. 

Роҳбарони ширкатҳои сохтмонӣ вазифадор гардиданд, ки дар таҳия ва бунёди иншоот талаботи қоидаҳои сохтмонӣ, усулҳои муосир ва унсурҳои меъмории миллиро риоя намоянд.

24 ноябр кишоварзони ноҳияи Бобоҷон Ғафуров аз иҷрои нақшаи истеҳсоли пахта гузориш доданд.

Раиси ноҳияи Бобоҷон Ғафуров Нусратулло Салимзода имрӯз “Муждаи зафар” - ро ба Раиси вилояти Суғд Раҷаб Аҳмадзода расонид, ки ин дастоварди меҳнаткашони ноҳия туҳфаи арзанда дар Рӯзи Парчами давлатии Ҷумҳурии Тоҷикистон арзёбӣ шуд.

Соли ҷорӣ дар ноҳияи Бобоҷон Ғафуров дар масоҳати 7505 гектар пахта кишт гардида, тамоми захираву имкониятҳо барои ба даст овардани ҳосили фаровон истифода бурда шуданд.

Бо талошҳои рӯзафзуни пахтакорони заҳматқарин то имрӯз 18 ҳазору 287,1 тонна пахта истеҳсол шуд. Ин нишондиҳанда ба 100,2 фоизи нақшаи солона баробар буда, иҷрои нақша натиҷаи заҳмати садоқатмандонаи кишоварзон мебошад.

24 ноябр дар Театри давлатии мазҳакаи мусиқии ба номи Камоли Хуҷандӣ бахшида ба Рӯзи Парчами давлатии Ҷумҳурии Тоҷикистон ҷамъомади тантанавӣ баргузор гардид.

Раиси вилояти Суғд Раҷаб Аҳмадзода ҳозирин ва дар симои онҳо тамоми сокинони вилоятро ба муносибати Рӯзи Парчами давлатии Ҷумҳурии Тоҷикистон табрик намуд.

Қайд карда шуд, ки парчамдорӣ ҷузъи муҳими фарҳанги давлатдории халқи тоҷик ба ҳисоб рафта, Парчами давлатӣ баёнгари мавҷудияти миллат ва давлат, соҳиби тамаддун ва таърихи бостонӣ будани миллати мост.

Махсусан, дар даврони нави таърихӣ Парчами давлатии мо ба рамзи ҳастии миллат, садоқат ба арзишҳои муқаддаси Ватану ватандорӣ, ҳимояи марзу буми он ва ҳифзи манфиатҳои давлату миллат мубаддал гардидааст.