10 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маркази шаҳри Конибодом бинои Муассисаи таҳсилоти томактабии №2-и “Ситора”-ро пас аз навсозӣ ифтитоҳ намуда, бо шароити он шинос шуданд.

Муассисаи томактабӣ ба истиқболи сазовори 33-солагии Истиқлоли давлатии Ҷумҳурии Тоҷикистон аз ҷониби Мақомоти иҷроияи ҳокимияти давлатии шаҳр ва саҳми соҳибкорони маҳаллӣ бунёд гардида, барои 250 нафар тарбиятгиранда пешбинӣ шудааст.

Дар кӯдакистон 8 гуруҳ амал намуда, ба кӯдакон 11 нафар мураббияҳои ботаҷриба бо ташкили бозиҳои ҷолибу шавқовар машғулият мегузаронанд.

10 сентябр дар доираи сафари корӣ ба вилояти Суғд Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Конибодом Муассисаи таҳсилоти томактабии №1 ба номи “Нури Робия”-ро, ки аз ҷониби соҳибкори ватандӯст, сарпарасти Фонди хайриявии “Музаффар” Даврон Ҷураев аз нав бунёд гардидааст, мавриди истифода қарор доданд.

Кӯдакистон ҳанӯз соли 1936 сохта шуда, соли 1999 бинобар садамавӣ шуданаш вайрон карда шуда буд.

Боғчаи нави бачагона дар доираи вусъати корҳои бунёдкориву созандагӣ дар масоҳати 1500 метри мураббаъ бо харҷи 6 миллион сомонӣ мувофиқ ба стандартҳои ҷаҳонӣ аз нав сохта ва ҷиҳозонида шуд. Ин боғча барои фарогирӣ ба таълиму тарбияи 180 кӯдак пешбинӣ шудааст.

Бинои кудакистон аз ду ошёна ва таҳхона иборат буда, дар он корҳои сохтмонӣ ҳануз аз соли 2023 оғоз гардид ва имрӯз бо сатҳу сифати баланд ба анҷом расонида шуд. Дар рафти сохтмонназдики 30 нафар сокинони маҳаллӣ бо кор ва маоши хуб таъмин гардиданд.

10 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ ба шаҳру ноҳияҳои вилояти Суғд дар шаҳри Конибодом коргоҳи истеҳсоли пойафзоли Ҷамъияти дорои масъулияти маҳдуди “Фароғат”-ро мавриди баҳрабардорӣ қарор доданд.

Коргоҳ дар масоҳати 230 метри мураббаъ бо саҳми соҳибкор Рустамзода Фирдавс бунёд шуда, баъди ифтитоҳ 20 нафар сокини маҳаллӣ бо ҷойи кори доимӣ ва маоши хуб таъмин гардиданд.

Коргарон нозукиҳои кор дар дастгоҳҳои истеҳсолиро омӯхта мустақилона ба тавлиди пояфзолҳои хушсифат машғул мебошанд. Оянда бо ба роҳ мондани истеҳсолот дар ду баст шумораи коргарон то ба 45 нафар расонида хоҳад шуд.

10 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни сафари корӣ ба шаҳри Конибодом бо ҷараёни корҳои сохтмонӣ дар роҳи мошингарди Конибодом-Кӯчкак шинос шуданд.

Иттилоъ дода шуд, ки татбиқи лоиҳаи “Беҳтар намудани роҳҳои алоқаи минтақавӣ ва Осиёи Марказӣ, БРАМОМ-4” моҳи марти соли 2023 оғоз гардида, кор дар 4 минтақаи вилояти Суғд, аз ҷумла, Куруш-Бекобод 12,3 километр, Деҳмой-Бобоҷон Ғафуров 22 километр, Бобоҷон Ғафуров-Хистеварз 6,6 километр ва Конибодом-Кӯчкак 10,3 километр, дар маҷмуъ бо дарозии умумии 51,2 километр бомаром идома дорад.

Бо таваҷҷуҳ ба аҳамияти байналмилалии ин роҳ, он аз рӯйи дараҷаи техникии якум ва сеюми роҳсозӣ бунёд карда мешавад. Дар 4 қитъаи навшавандаи роҳҳои мошингарди вилояти Суғд навсозии 11 пул бо дарозии умумии 457,3 метр низ дар назар дошта шудааст.