16 октябр бо иштироки Раиси вилояти Суғд Раҷаб Аҳмадзода дар Минтақаи озоди иқтисодии “Суғд” ба бунёди корхонаи нави саноатӣ санги асос гузошта шуд.

Тибқи иттилои масъулон корхонаи коркард ва банду басти меваи хушк бо номи “Фуд Агро Суғд” дар заминаи дастгириҳои Ҳукумати Ҷумҳурии Тоҷикистон ва бо мақсади саҳмгузорӣ дар рушди соҳаи саноат бунёд меёбад. Дар асоси пешбинӣ корхона соли оянда ба истифода дода шуда, барои 100 нафар шаҳрванд ҷойи кори доимӣ фароҳам меорад.

Ҷамъияти дорои масъулияти маҳдуди “Фуд Агро Суғд” инчунин нақша дорад дар шаҳри Конибодом дар масоҳати 500 гектар боғи нав бунёд намояд. Татбиқи ин ташаббус имконият медиҳад, ки ҷамъият бо истифода аз маҳсулоти ватанӣ раванди пурраи коркард ва бандубасти меваҳоро ба роҳ монда, маҳсулотро ба бозорҳои дохилӣ ва хориҷӣ барорад.

15 октябр дар шаҳри Фарғонаи Ҷумҳурии Ӯзбекистон нахустин "Форуми сулҳи Фарғона" баргузор гардид, ки ҳадафи он таҳкими дӯстӣ, ҳамдигарфаҳмӣ ва густариши ҳамкории кишварҳои Осиёи Марказӣ мебошад.

Дар кори форум Раиси вилояти Суғд Раҷаб Аҳмадзода, ҳокими вилояти Фарғона Хайрулло Бозоров, раиси вилояти Ботканди Ҷумҳурии Қирғизистон Айбек Шаменов, намояндагони корпусҳои дипломатӣ, роҳбарони созмонҳои байналмилалӣ, инчунин соҳибкорон ва намояндагони дигар кишварҳои Осиёи Марказӣ иштирок намуданд.

Дар маросими ифтитоҳии форум ҳокими вилояти Фарғона Хайрулло Бозоров бо сухани ифтитоҳӣ баромад намуда, саҳми сарони давлатҳои Тоҷикистон, Ӯзбекистон ва Қирғизистонро дар таҳкими дӯстии халқҳо ва рушди иқтисодиву иҷтимоии минтақа муҳим арзёбӣ кард. Ӯ таъкид намуд, ки баргузории ин форум дар асоси созишномаҳои байниҳукуматии сарони се давлат, ки 31 марти соли ҷорӣ дар вилояти Суғди Ҷумҳурии Тоҷикистон ба имзо расида буданд, сурат гирифт ва изҳори умед кард, ки натиҷаҳои форум дар таҳкими ҳамкориҳои минбаъда нақши назаррас хоҳанд дошт.

Дар доираи корҳои ободониву созандагӣ ба ифтихори ҷашни 35-солагии Истиқлоли давлатии Ҷумҳурии Тоҷикистон дар шаҳри Хуҷанд корҳои навсозӣ ва сохтмони инфрасохтори муҳими коммуналӣ бо маром идома доранд. 

Дар ин замина бо иштироки Раиси вилояти Суғд Раҷаб Аҳмадзода, роҳбарияти шаҳри Хуҷанд, меъморон, лоиҳакашон ва масъулони соҳаи обу корезии шаҳр лоиҳаи сохтмони шабака ва пойгоҳи партовоббардории соҳили рости шаҳри Хуҷанд муаррифӣ шуд.

Тавре масъулин иттилоъ доданд, лоиҳаи мазкур аз ҷониби ширкати “Муҳандисони ояндасоз” таҳия гардида, бо дастгирии Мақомоти иҷроияи ҳокимияти давлатии вилояти Суғд ва саҳми соҳибкорони маҳаллӣ амалӣ мегардад. Мутобиқи нақша, тамоми хатти ташноб дар соҳили рости шаҳр ба масофаи 11 километр пурра навсозӣ хоҳад шуд. Барои ин лӯлаҳои қутрашон аз 800 то 1200 миллиметра насб мегарданд.

Нимаи дуюми рӯзи 14 октябр дар толори хурди Мақомоти иҷроияи ҳокимияти давлатии вилояти Суғд таҳти раёсати Раиси вилоят Раҷаб Аҳмадзода машварати корӣ баргузор гардид, ки дар он масъалаҳои марбут ба ҷамъоварии пахта, кишти тирамоҳии ғалла, пиёзи барвақтӣ, сабзӣ ва шолӣ мавриди баррасӣ қарор гирифт.

Дар ҷаласа раисони шаҳру ноҳияҳо, роҳбарони ташкилоту муассисаҳо ва масъулони соҳаи кишоварзӣ иштирок намуда, доир ба раванди иҷрои нақшаҳо ҳисобот доданд.

Раиси вилоят Раҷаб Аҳмадзода зимни суханронӣ таъкид намуд, ки бо истифода аз рӯзҳои мусоиди тирамоҳ бояд ҷамъоварии пахта бо суръат ва сифати баланд ба анҷом расонида шавад. Ҳоло дар навоҳии пахтакор ҳосили зиёд боқӣ мондааст ва обу ҳавои хуби фасли тирамоҳ имконият медиҳад, ки дастранҷи деҳқонон беталаф ҷамъоварӣ гардад.