Дар толори мақомоти иҷроияи ҳокимияти давлатии шаҳри Конибодом таҳти раёсати Раиси вилояти Суғд Раҷаб Аҳмадзода ҷаласаи корӣ баргузор гардид, ки дар он масъулини сохторҳои дахлдори вилоят, роҳбарият ва фаъолони шаҳр ширкат варзиданд.

Дар ҷаласа асосан рафти иҷрои дастуру супоришҳои Ҳукумати Ҷумҳурии Тоҷикистон дар шаҳр мавриди таҳлил ва баррасӣ қарор гирифт.

Зимни таҳлили вазъи соҳаҳо таъкид гардид, ки ба масъалаҳои ободонӣ, баланд бардоштани маърифати ҳуқуқии аҳолӣ, пешгирии ҷинояткорӣ, беҳтар намудани сатҳи таълиму тарбия, рушди хизматрасонии тиббӣ, пешрафти иқтисодии шаҳр ва беҳтар намудани нишондиҳандаҳои соҳаи кишоварзӣ таваҷҷуҳи махсус дода шавад.

Раиси вилояти Суғд Раҷаб Аҳмадзода зимни сафари корӣ ба шаҳри Конибодом бо фаъолияти корхонаҳои саноатӣ ва истеҳсолӣ аз наздик шинос гардид.

Дар ҷараёни боздид нахуст Раиси вилоят бо фаъолияти коргоҳи коркарди пахтаи Ҷамъияти дорои масъулияти маҳдуди «Пахтаи Ориён» шинос шуд. Зикр гардид, ки шаҳри Конибодом яке аз минтақаҳои асосии истеҳсолкунандаи «тиллои сафед» ба шумор рафта, фаъолияти бомароми корхонаҳои пахтатозакунӣ дар дастгирии хоҷагидорон ва рушди соҳаи пахтапарварӣ нақши калидӣ дорад. Айни замон пахтаҳои қабулшуда аз ҷониби масъулони «Пахтаи Ориён» ба коркарди минбаъда фаро гирифта шудааст. 

Ҳамзамон Раиси вилоят бо фаъолияти корхонаи коркард ва бастубанди меваи хушк- ҶДММ «Неруи Канд» шинос шуд. Корхонаи мазкур яке аз корхонаҳои муваффақи шаҳр маҳсуб ёфта, меваи хушкро коркард, бастубанд ва содирот мекунад. Барои иҷрои корҳо дар корхона 25 нафар сокинони маҳаллӣ ба кор ҷалб гардидаанд.

Дар шаҳри Конибодом корҳои бунёду навсозии иншооти соҳаи тарбияи ҷисмонӣ ва варзиш вусъат ёфта, дар доираи ин тадбирҳо майдончаи хурди футбол дар назди Муассисаи таҳсилоти миёнаи умумии №24 ба истифода дода шуд.

Дар маросими ифтитоҳи майдончаи варзишӣ Раиси вилояти Суғд Раҷаб Аҳмадзода иштирок намуда, иброз дошт, ки рушди соҳаи варзиш ва фароҳам овардани шароити мусоид барои машғулияти наврасону ҷавонон яке аз самтҳои муҳими сиёсати иҷтимоии давлат ба шумор меравад. Ба таъкиди роҳбари вилоят ба истиқболи ҷашни 35-солагии Истиқлоли давлатии Ҷумҳурии Тоҷикистон бо дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои ободониву созандагӣ дар ҳамаи шаҳру ноҳияҳои вилояти Суғд бо маром идома доранд.

Гуфта шуд, ки бунёди чунин иншооти варзишӣ дар назди муассисаҳои таълимӣ барои ҷалби хонандагон ба тарзи ҳаёти солим, рушди қобилияти ҷисмонӣ ва тарбияи рӯҳияи солим заминаи мусоид фароҳам меорад. Ҳамзамон, ифтитоҳи толори варзишӣ дар назди МТМУ №6 низ далели таваҷҷуҳи рӯзафзуни масъулон ба рушди инфрасохтори варзишӣ дар шаҳри Конибодом мебошад.

Раиси вилояти Суғд Раҷаб Аҳмадзода зимни сафари корӣ ба шаҳри Конибодом бо ҷараёни корҳои ободониву созандагӣ дар иншооти ҷашнӣ шинос гардид.

Дар шаҳри Конибодом таъмири куллии шуъбаи ҷарроҳии калонсолони Беморхонаи марказии шаҳр идома дошта, пас аз анҷоми пурраи корҳои сохтмонӣ ин шуъба бо дастгоҳу таҷҳизоти зарурии муосири тиббӣ таъмин мегардад.

Шуъбаи мазкур дорои 25 кат буда, навсозии он ба беҳтар гардидани сатҳи хизматрасонии тиббӣ ба аҳолӣ мусоидат хоҳад кард. Ҳамчунин зикр гардид, ки то имрӯз бинои чорқабатаи беморхонаи кӯдакона, шуъбаи ҷарроҳии кӯдакона ва шуъбаи таваллуди беморхонаи марказӣ пурра аз таъмир бароварда шуда, айни ҳол дар шуъбаҳои осебшиносӣ ва наҷот корҳои таъмиру навсозӣ идома дорад.