Мақомоти иҷроияи ҳокимияти
давлатии вилояти Суғд
Раиси вилояти Суғд Раҷаббой Аҳмадзода дар доираи сафари корӣ ба ноҳияи Зафаробод ду нафар собиқадорони меҳнатро аёдат намуд.
Раҷаббой Аҳмадзода аз ҳоли Раҳмат Аҳмадов ва Ҷонибек Холматов хабар гирифта, бо пирони кор сӯҳбати самимӣ анҷом дод. Зимни суҳбат аёдатшудагон аз фаъолияти кории худ дар соҳаи кишоварзӣ ёдовар шуда, барои дастгириҳои доимӣ ба Пешвои муаззами миллат муҳтарам Эмомалӣ Раҳмон миннатдорӣ баён намуданд.
Дар Ҷамоати деҳоти Ҷомии ноҳияи Зафаробод бинои нави муассисаи таҳсилоти миёнаи умумии рақами 3 бунёд гардида, бо мавриди истифода қарор гирифтани иншоот хонандагон дар шароити беҳтарин таҳсили худро идома медиҳанд.
Раиси вилояти Суғд Раҷаббой Аҳмадзода зимни сафари корӣ ба ноҳияи Зафаробод ҷараёни корҳои сохтмонии муассисаи таҳсилоти миёнаи умумиро мавриди таваҷҷуҳ қарор дод. Иттилоъ дода шуд, ки бинои дуошёнаи таълимӣ дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои 600 хонанда дар як баст сохта мешавад.
Бахшида ба Иди Меҳргон бо ибтикори мақомоти иҷроияи ҳокимияти давлатии вилояти Суғд ярмарка-фурӯши маҳсулоти кишоварзӣ ташкил карда шуд.
Чун ҳарвақта ярмарка-фурӯши маҳсулоти кишоварзӣ дар назди Театри давлатии мазҳакаи мусиқии ба номи Камоли Хуҷандӣ доир шуда, ба сокинон маҳсулоти гуногун бо нархҳои нисбат ба бозор то 30 дарсад арзон пешниҳод гардид. Кишоварзони вилоят ва корхонаҳои саноатӣ маводи ғизоӣ, аз ҷумла орду равған, биринҷ, пиёзу картошка, сабзӣ, тухм, гӯшт, себу анор, ангур, харбузаву тарбуз, нушокиву шириниҳоро ба фурӯш бароварданд.
Ҳамватанони азиз!
Ҳамаи шуморо бо фарорасии ҷашни Меҳргон — яке аз куҳантарин ойинҳои мардуми куҳанбунёди тоҷик, ки айёми ҷамъоварии маҳсули заҳмати кишоварзон, айёми фаровонӣ ва шодиву нишот мебошад, самимона табрик мегӯям.
Меҳргон дар таърихи тамаддуни мардумони ориёитабор пас аз Наврӯз дуюмин ҷашни бузург аст, ки бо табиат ва кишоварзиву боғдорӣ иртиботи мустақим дорад ва инъикоскунандаи решаҳои амиқи иҷтимоиву иқтисодӣ ва маънавию фарҳангӣ мебошад.
Дар асоси Қонуни Ҷумҳурии Тоҷикистон «Дар бораи рӯзҳои ид» ҳамасола якшанбеи сеюми моҳи октябр дар қаламрави кишвари азизамон Тоҷикистони соҳибистиқлол Иди Меҳргон бо шукӯҳи хоса ҷашн гирифта мешавад.
Ба ин муносибат, кулли сокинони сарбаланду заҳматқарини вилоятро табрику таҳният гуфта, ба ҳамагон сиҳату саломатӣ, хотирҷамъӣ, барори кор ва дастоварду муваффақиятҳо орзу менамоям.
