29 декабри соли равон дар вилояти Ботканди Ҷумҳурии Қирғизистон мулоқоти ҳайатҳои вилояти Суғди Ҷумҳурии Тоҷикистон ва вилояти Ботканди Ҷумҳурии Қирғизистон баргузор гардид.

Дар мулоқот Раиси вилояти Суғд Раҷаб Аҳмадзода ва намояндаи ваколатдори Президенти Ҷумҳурии Қирғизистон дар вилояти Ботканд Айбек Шаменов иштирок намуда, аз сатҳи кунунии муносибатҳои дӯстона ва робитаҳои ҳасанаи ду кишвари ҳамсоя — Тоҷикистон ва Қирғизистон изҳори қаноатмандӣ намуданд. Таъкид гардид, ки ин равобити нек самараи сиёсати оқилона ва хирадмандонаи сарони ду давлат мебошад.

Зикр шуд, ки дар заминаи сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров муносибатҳои дӯстонаи Тоҷикистону Қирғизистон дар соли 2025 ба марҳилаи сифатан нав ворид гардиданд. Аз ҷумла, бозкушоии расмии гузаргоҳҳо дар сарҳади давлатии ду кишвар имконият фароҳам овард, ки мардуми Тоҷикистону Қирғизистон дубора робитаҳои деринаи ҳамсоядориро эҳё намуда, роҳи нави ҳамкориҳои густурдаи иқтисодӣ, тиҷоратӣ ва фарҳангиро боз намоянд.

Раиси вилояти Суғд, Раиси Федератсияи футболи вилоят Раҷаб Аҳмадзода сармураббии нави дастаи футболи “Хуҷанд”-ро ба ҳузур пазируфт.

Мутахассиси варзида аз Ҷумҳурии Сербия Милан Миланович ба ҳайси сармураббии нави даста таъин гардид. Ӯ соҳиби муҷаввизи баландтарин дараҷаи мураббигӣ — “UEFA Pro” буда, дар кишварҳои Сербия, Руминия ва Қазоқистон фаъолият намудааст.

Дар мулоқот масъалаҳои баланд бардоштани сатҳи бозии даста, беҳтар намудани нишондиҳандаҳои варзишӣ, ҷалби бозигарони ботаҷриба ва тарбияи футболбозони ҷавон мавриди баррасӣ қарор гирифтанд. Раиси вилоят ба сармураббии нав барори кор хоста, ҷиҳати дар сатҳи баланд омода намудани даста ва таъмини иштироки фаъолона дар мусобиқаҳои дохиливу байналмилалӣ супоришҳои мушаххас дод.

27 декабри соли 2025 Раиси вилояти Суғд Раҷаб Аҳмадзода дар арафаи таҷлили Соли нави мелодӣ бо собиқадорони меҳнат ва шахсиятҳои барӯманд мулоқот намуд.

Зимни суҳбат Раиси вилоят таъкид кард, ки соли 2025 барои кишвар ва вилояти Суғд бо дастовардҳои назаррас ҷамъбаст мегардад. Ба гуфтаи роҳбари вилоят дар натиҷаи меҳнати софдилона ва заҳмати шабонарӯзии мардуми кишвар корҳои ободонию созандагӣ вусъат ёфта, татбиқи барномаҳои рушди иҷтимоию иқтисодӣ ба беҳтар шудани сатҳу сифати зиндагии аҳолӣ мусоидат намуда истодааст. Таъкид гардид, ки дар доираи омодагиҳо ба ҷашни 35-солагии Истиқлоли давлатии Ҷумҳурии Тоҷикистон дар шаҳру ноҳияҳои вилояти Суғд беш аз 12 ҳазор иншооти гуногун ба истифода дода шуда, бунёди иншооти иловагӣ идома дорад.

Бахшида ба Соли нави мелодӣ имрӯз дар шаҳри Хуҷанд ярмарка-фурӯши маҳсулоти кишоварзӣ ташкил гардид. Раиси вилояти Суғд Раҷаб Аҳмадзода аз ҷараёни ярмарка-фурӯши маводи ғизоӣ боздид намуда, ҷиҳати таъмини фаровонии маҳсулот ва пешниҳоди он бо нархҳои нисбат ба бозор арзон ба роҳбарияти идораҳои дахлдор супоришҳои мушаххас дод.

Дар ярмарка маҳсулоти гуногуни ниёзи аввалия, аз ҷумла гӯшт, макарон, орд, равған, шакар, меваву сабзавот, полезиҳо, нон, маҳсулоти шириву гӯштӣ, инчунин обу афшураҳо ба сокинон пешниҳод гардид. Ин тадбир ба беҳтар намудани таъминоти аҳолӣ бо маҳсулоти босифату дастрас ва ғанӣ гардонидани дастархони идонаи мардум равона шудааст.

Қайд гардид, ки дар натиҷаи амалисозии барномаҳои соҳавӣ ва иҷрои дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рушди соҳаи кишоварзӣ таъмин гардида, фаровонии маҳсулоти ватанӣ дар бозорҳо ба назар мерасад.