Дар арафаи Соли нави мелодӣ Раиси вилояти Суғд Раҷаб Аҳмадзода ба дидорбинии як қатор собиқадорони меҳнат рафт.

Зимни мулоқот роҳбари вилоят аз номи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон собиқадорони соҳаҳои гуногун, аз ҷумла Ӯғулой Неъматова, Инъомҷон Маҳмудов, Биомина Сатторова ва дигаронро бо фарорасии Соли нав самимона табрику таҳният гуфт.

Раиси вилоят аснои суҳбат таъкид кард, ки соли сипаришуда барои мардуми Тоҷикистон соли вусъати бесобиқаи корҳои ободониву созандагӣ ва ташаббусҳои ватандӯстона ба ҳисоб меравад. Зикр гардид, ки сокинони кишвар дар ҳамаи самтҳои ҳаёти ҷомеа бо ҳисси баланди масъулият меҳнат намуданд ва дар натиҷа имрӯз сатҳи зиндагии мардум беҳтар шуда, шаҳру деҳоти мамлакат ободу зебо гардидааст. 

Бо мақсади таъмини иҷрои дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бахшида ба Соли нави мелодӣ ба зиёда аз 550 нафар кормандони Сарраёсати ободонӣ, хоҷагию манзилӣ ва коммуналии шаҳри Хуҷанд кўмакҳои ғизоӣ тақдим карда шуд.

Раиси вилояти Суғд Раҷаб Аҳмадзода зимни суҳбати самимӣ бо рўбандаю покизакорон ва дигар кормандони масъули Сарраёсати ободонии шаҳр таъкид дошт, ки заҳмати шабонарўзии ҳар як корманди ҷодаи ободонӣ ҳамеша қадршиносӣ мегардад, зеро аз фаъолияти бомаром ва самаровари онҳо тозагӣ ва хуррамии маркази маъмурии вилояти Суғд –шаҳри Хуҷанд вобастагии зиёд дорад. 

Раҷаб Аҳмадзода таъкид дошт, ки ҳар гоҳ, ки сокинону меҳмонон аз тамошои дарахтони ҳамешасабз, гулҳои рангоранг, сабзазор ва кӯчаву хиёбонҳои зебо, тозаю озодаи шаҳри бостонии Хуҷанд, таровату мунавварии шаҳр ба ваҷд меоянд, пеш аз ҳама ба меҳнати шумоён баҳои баланд медиҳанд.

29 декабр Раиси вилояти Суғд Раҷаб Аҳмадзода дар шаҳри Исфара аз ҳоли собиқадорони меҳнат хабар гирифт.

Зимни суҳбат бо собиқадорони меҳнат Субҳон Ёдгорӣ ва Наҷминисо Қурбонов аз саҳми арзишманди онҳо дар рушди ҷомеа ёдоварӣ шуд. Ба нишони арҷгузорӣ ба заҳмати содиқонаи онҳо аз номи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон туҳфаҳои моливу пулӣ тақдим гардид.

Ҳамчунин, Раиси вилояти Суғд Раҷаб Аҳмадзода сокини 102-солаи шаҳри Исфара Лутфияхон Қобиловаро аёдат намуд. 

Раиси вилоят ба ин зани куҳансол саломатии бардавом ва рӯзгори обод орзу намуда, туҳфаҳои Сарвари давлатро ба ӯ тақдим кард.

Бо мақсади таъмини иҷрои дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Исфара ба кӯдакони ятим либосҳои зимистона ва туҳфаҳои солинавӣ тақдим гардид.

Раиси вилояти Суғд Раҷаб Аҳмадзода зимни мулоқот бо наврасон иброз дошт, ки дар Тоҷикистони соҳибистиқлол дастгирии ятимону берасторон ҳамеша дар меҳвари сиёсати иҷтимоии давлат қарор дошта, давлату Ҳукумат масъулияти парасторӣ ва дастгирии ин қишри ҷомеаро бар уҳда дорад.

Таъкид гардид, ки дар ҷавоб ба чунин ғамхориҳои пайваста, кӯдакону наврасон бояд ба омӯзиши илму дониш таваҷҷуҳи ҷиддӣ зоҳир намуда, дар оянда ҳамчун фарзандони содиқи халқу Ватан хизмат намоянд.