Дархост аз ҳашт донишгоҳи маъруфи олам ба Алишер Қосимов. Хонандаи тоҷик соҳиби гранти омӯзишӣ гардид

Алишер Қосимов, хонандаи синфи 11-уми Литсей барои хонандагони болаёқат дар шаҳри Хуҷанд соҳиби шоҳҷоиза - гранти омӯзишӣ ба маблағи умумии 1 миллион доллари амрикоӣ гардид ва имкони идомаи таҳсил дар яке аз ҳашт донишгоҳи бонуфузи Амрико ва Швейтсарияро ба даст овард.

Тибқи иттилои директори Литсей барои хонандагони болаёқат дар шаҳри Хуҷанд Сурайё Негматова Алишер Қосимов дар чанд озмуни донишгоҳҳои ИМА ва Швейтсария дар соли 2022 иштирок намуда, соҳиби шоҳҷоиза шуд ва якбора ҳашт донишгоҳ — Донишгоҳи Дрейк дар штати Айова, донишгоҳи Эмори ва Хенри дар штати Вирҷиния, донишгоҳи Вирҷинияи Ғарбӣ дар штати Вирҷиния, донишгоҳи Ла Верна дар штати Калифорния, донишгоҳи Аризона дар штати Аризона, донишгоҳи Гарднер Веб дар штати Каролинаи Шимолӣ, донишгоҳи Невада дар Лас Вегас ва донишгоҳи Франклин дар кишвари Швейтсария бо ирсоли мактуби расмӣ эълони омодагии қабули хонандаи тоҷикро тариқи буҷавӣ(ройгон) намуданд, ки маблағи умумии он беш аз 1 миллион доллари амрикоӣ хоҳад шуд. 

Театри Конибодом дар Душанбе намоишномаи «Калдампоча»-ро ба саҳна мегузорад

Ҳунармандони Театри давлатии мусиқӣ-драмавии ба номи Туҳфа Фозиловаи шаҳри Конибодом 16 апрели соли 2022 дар толори Театри давлатии тамошобини ҷавон “Аҳорун”-и шаҳри Душанбе намоишномаи “Калдампоча”-ро ба саҳна мегузоранд.

Тибқи иттилои директори Театри давлатии мусиқӣ-драмавии ба номи Туҳфа Фозилова Ғайрат Қодиров оғози намоиш соати 14 ба нақша гирифта шудааст. Намоиши “Калдампоча” тӯли 3 моҳ тариқи онлайн офарида шуд. Коргардон дар Лондон, рассом дар Тошканд ва ҳунармандон дар Конибодом истода тариқи ZOOM тамрин намудаанд.

Озмуни вилоятии «Китобхонаи намунавии вилояти Суғд дар соли 2022» гузаронида мешавад

Соли ҷорӣ дар байни китобхонаҳои низоми фарҳанги шаҳру ноҳияҳо озмуни вилоятии «Китобхонаи намунавии вилояти Суғд дар соли 2022» гузаронида мешавад. Дар ин бора қарори Раиси вилояти Суғд Раҷаббой Аҳмадзода ба имзо расид.

Озмуни мазкур бо мақсади дуруст ба роҳ мондани фаъолияти китобхонаҳои низоми фарҳанги вилоятӣ, ноҳиявӣ, шаҳрӣ ва китобхона-филиалҳои шаҳраку деҳот, ҷалби бештари аҳолӣ ба мутолиаи китоб ва бахшида ба 30-солагии Иҷлосияи 16-уми Шӯрои Олии Ҷумҳурии Тоҷикистон эълон гардид.