Муовини Сарвазири мамлакат Матлубахон Сатториён дар Мастчоҳ аз муассисаҳои соҳаҳои тандурустӣ, маориф ва фарҳанг дидан кард

Дирӯз дар доираи сафари корӣ ба шаҳру ноҳияҳои вилояти Суғд муовини Сарвазири Ҷумҳурии Тоҷикистон Матлубахон Сатториён дар ноҳияи Мастчоҳ аз муассисаҳои соҳаҳои тандурустӣ, маориф ва фарҳанг дидан намуда, бо шароити хизматрасонӣ, таълиму тарбия ва баланд бардоштани маънавиёти мардум аз наздик шинос шуд. Дар ин бора дафтари матбуоти раиси ноҳия хабар медиҳад.

Зимни боздид муовини Сарвазири мамлакат аз муассисаи таълимии №26 ва Маркази саломатии Ҷамоати деҳоти Оббурдон бо омӯзгорон ва табибон ҳамсуҳбат шуда, доир ба баланд бардоштани сатҳу сифати таълим, омӯзиши фанҳои дақиқ, забономӯзӣ, таъминот бо китобҳои дарсӣ ва беҳтар намудани хизматрасонии тиббӣ ба аҳолӣ, махсусан дар деҳот дастур ва маслиҳатҳои муфид дод.

Ба Беморхонаи марказии ноҳияи Кӯҳистони Мастчоҳ мошини ёрии таъҷилӣ супурда шуд

4-уми апрели соли 2022 ба хотири беҳтару хубтар намудани хизматрасонии тиббӣ ба аҳолӣ ба  Беморхонаи марказии ноҳияи Кӯҳистони Мастчоҳ як мошини ёрии таъҷилии муосир бо тамоми таҷҳизоти лозимӣ дастрас гардид. 

Ин мошин истеҳсоли давлати Ҷопон буда, дар дохилаш тамоми дастгоҳҳои шӯъбаи эҳёгариро доро буда, аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба Беморхонаи марказӣ тақдим гардидааст. Тавре дар суҳбат сартабиби беморхонаи марказии ноҳия Солеҳова Меҳринисо гуфт, ин  дастгириҳои Вазорати тандурустӣ барои боз ҳам беҳтар намудани  хизматрасонии  тиббӣ ба сокинони ноҳия пешбинӣ шуда, кори табибонро  хеле осон мегардонад.

Ба Беморхонаи марказии ноҳияи Мастчоҳ мошини ёрии таъҷилӣ дастрас гардид

30 марти соли равон бо мақсади беҳтар намудани сатҳу сифати хизматрасонии тиббӣ ба аҳолӣ ба Беморхонаи марказии ноҳияи Мастчоҳ як мошини ёрии таъҷилии муосир бо тамоми таҷҳизоти лозимӣ дастрас гардид.  Ин мошини ёрии таъҷилӣ сохти давлати Кореяи Ҷанубӣ буда, дар дохилаш дастгоҳу таҷҳизоти замонавии тиббӣ, аз қабили сабти барқии дил (ЭКГ), дефиблятор (дастгоҳи барқии таҳрикдиҳандаи кори дил), дастгоҳи нафасдиҳии сунъӣ бо ду балони оксиген ва ғайра насб шуда, кафолати беҳтару бештари хизматрасонии тиббӣ таъмин гардидааст.

Мошини ёрии таъҷилӣ аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба Беморхонаи марказии ноҳияи Мастчоҳ тақдим гардидааст.