Хабарҳо
Ба истифода додани роҳи мошингарди пайвасткунандаи шаҳраки Мӯъминобод ва деҳаҳои Деҳлоло ва Хосабой бо иштироки Сарвари давлат Эмомалӣ Раҳмон - 25.09.2020 15:04
Пешвои миллат Эмомалӣ Раҳмон боғи фарҳангӣ-фароғатиро дар маркази ноҳияи Мӯъминобод мавриди баҳрабардорӣ қарор доданд - 25.09.2020 15:03
Сарвари давлат Эмомалӣ Раҳмон бо ҳолати истифодаи замини наздиҳавлигӣ дар манзили истиқоматии шаҳрванд Абдуфаёз Одинаев дар ноҳияи Мӯъминобод шинос шуданд - 25.09.2020 15:02
Президенти мамлакат Эмомалӣ Раҳмон бинои истиқоматиро дар ноҳияи Мӯъминобод мавриди баҳрабардорӣ қарор доданд - 25.09.2020 15:00
Боздиди Пешвои миллат Эмомалӣ Раҳмон аз ҳолати истифодаи замин, ҷамъоварии ҳосили картошка ва намоиши маҳсулоти кишоварзӣ дар мавзеи Гулистони ноҳияи Муъминобод - 25.09.2020 14:58
Сарвари давлат Эмомалӣ Раҳмон дар деҳаи Заркамари ноҳияи Мӯъминобод ба фаъолияти корхонаи Ҷамъияти дорои масъулияти маҳдуди «Дуоб-Р» оғозӣ расмӣ бахшиданд - 25.09.2020 14:56
Дар Хуҷанд Маркази тиҷоратии ““Шаҳри афсонавӣ” ба истифода дода шуд - 25.09.2020 14:22
Вохӯрии раиси Шӯрои ВАО бо донишчуёни кафедраи журналистика ва назарияи тарҷумаи ДДХ - 25.09.2020 09:53
Раиси вилоят собиқадори соҳаи кишоварзӣ Каримҷон Ҷӯраевро аёдат намуд - 24.09.2020 17:06
Шиносоӣ бо рафти ҷамъоварии пахта дар Конибодом - 24.09.2020 17:03

Навиди Суғд


Суханронии Пешвои миллат Эмомалӣ Раҳмон дар маросими ифтитоҳи варзишгоҳ дар ноҳияи Мастчоҳи вилояти Суғд

( 0 Овоз )

14.09.2020, ноҳияи Мастчоҳ

Ҳамватанони азиз!
Ҳозирини гиромӣ!

Ҳамаи шумо ва кулли сокинони сарбаланди вилояти Суғдро бори дигар ба ифтихори бисту нӯҳумин солгарди истиқлоли давлатии Ҷумҳурии Тоҷикистон самимона табрик мегӯям.

Мехоҳам бо қаноатмандӣ иброз намоям, ки сокинони вилоят, аз ҷумла мардуми ноҳияи Мастчоҳ ин ҷашни барои ҳар шаҳрванди ватандӯсти Тоҷикистон муқаддасу азизро дар баробари тамоми мардуми кишвар бо омодагии шоиста ва дастовардҳои арзанда таҷлил намуданд.

Мо ин падидаи некро давоми чанд рӯзи сафари корӣ ба шаҳру ноҳияҳои вилояти Суғд мушоҳида кардем. Мардуми заҳматкаши вилоят тавассути татбиқи самараноки сиёсати давлат ва Ҳукумати мамлакат дар самти корҳои ободонӣ иқдомҳои хеле назаррасро ба анҷом расонидаанд.

Ва ҳоло дар вилоят раванди ободониву созандагӣ ба хотири истиқболи ҷашни муқаддасу бузурги халқамон — сисолагии истиқлоли давлатӣ босуръат идома дорад.

Умуман, дар шаҳру ноҳияҳои вилоят то моҳи сентябри соли 2021 бунёду азнавсозии беш аз 7200 иншооту биноҳо ба нақша гирифта шудааст.

Тибқи маълумот дар вилоят то имрӯз аз ҳисоби буҷет, инчунин, соҳибкорону шахсони саховатманд ва сармоягузорони хориҷӣ сохтмон ва азнавсозии беш аз 5000 иншооти таъиноти гуногун, аз ҷумла, 254 муассисаи таҳсилоти умумиву томактабӣ, 74 иншооти соҳаи фарҳанг, 344 беморхона, бунгоҳи тиббӣ, маркази тиббӣ ва дигар муассисаҳои тандурустӣ, 731 маркази хизматрасониву савдо, 29 меҳмонхона, ҳамчунин, 17 боғи фарҳангу фароғат, 40 гулгашт, 335 толори варзиш, майдончаи варзишӣ ва майдонча барои бозии кӯдакон, 235 корхонаи истеҳсолӣ ва беш аз 2800 иншооти дигар сохта, ба истифода дода шудааст.

Дар соли 2020-ум бунёду таҷдиди қариб 1900 иншоот ба нақша гирифта шуда, дар давоми 7 моҳ 986 иншоот ба истифода дода шудааст.

Аз ҳисоби мавриди истифода қарор гирифтани иншооту корхонаҳои зикргардида дар шаҳру ноҳияҳои вилоят қариб 15 ҳазор ҷойи нави корӣ таъсис дода шудааст.

Мо имрӯз дидем, ки дар ноҳияи Мастчоҳ низ раванди бунёдкорӣ ба шарафи ҷашни 30-солагии истиқлоли давлатӣ бомаром идома дорад.

Мехоҳам хотиррасон созам, ки ноҳияи Мастчоҳ аз оғози солҳои 60-уми асри гузашта дар тафаккури мардуми Тоҷикистон чун майдони ҷасорату мардонагии халқамон ҷой гирифтааст.

Зеро он замон ин мавзеъ ғайр аз офтоби сӯзони болои сар ва дашти ташналаб чизе надошт.

Падару модарони наслҳои имрӯза, ки аз диёри кӯҳистони сабзу обод ба ин мавзеъ омада, барои ободии он камар баста буданд, дашти ташналаби Дилварзинро обод ва чӯлистони беобу сӯзонро ба гулистон табдил доданд.

Имрӯз ман дар симои ҷавонони паҳлавонсурату қаҳрамонсират ва бонувони мастчоҳӣ чеҳраҳои ҳамон абармардони заҳматнописанду занони нуронии кӯҳистониро мебинам, ки анъанаҳои аҷдоди шарафманди хешро дар тақвияти корҳои ободониву созандагӣ бо ғайрати ватандӯстона идома медиҳанд.

Тибқи нақшаи тасдиқгардида дар ноҳияи Мастчоҳ солҳои 2018-2021-ум бунёду азнавсозии 531 иншооту биноҳо пешбинӣ шуда, то имрӯз 369 иншоот ба истифода супорида шудааст.

Ҳоло корҳо дар ин самт идома доранд ва бовар дорам, ки ҳамаи иншооти ба нақша гирифташуда сари вақт, бо сифати баланд ва бо риояи талаботи меъмории муосир ба истифода супорида мешавад.

Дар 29 соли истиқлоли давлатӣ, Ҳукумати мамлакат ба таъмин намудани рушди босуботи иҷтимоиву иқтисодии ноҳияи Мастчоҳ ва баланд бардоштани сатҳу сифати зиндагии мардуми ин диёр пайваста таваҷҷуҳ зоҳир карда, дар ин муддат аз ҳисоби буҷети давлатӣ 565 миллион сомонӣ маблағ ҷудо намудааст.

Илова бар ин, дар ин давра дар ноҳия 19 лоиҳаи давлатии сармоягузорӣ доир ба барқарорсозии инфрасохтор ва рушди деҳот, сохтмону муҷаҳҳаз намудани муассисаҳои таълимӣ ва тандурустӣ, бунёду таҷдид ва нигоҳдории роҳҳои мошингард, сохтмони хатҳои интиқоли нерӯи барқ ва кам кардани талафоти он, таъмини рушди устувори соҳаи пахтакорӣ ва дастгирии хоҷагиҳои деҳқонӣ ба маблағи зиёда аз 209 миллион сомонӣ амалӣ гардидааст. Инчунин, ҳоло дар ноҳия аз ҷониби Ҳукумати кишвар боз 7 лоиҳаи сармоягузории давлатӣ ба маблаги 35 миллион сомонӣ татбиқ шуда истодааст.

Дар замони соҳибистиқлолӣ дар ноҳия 17 муассисаи таҳсилоти умумӣ, 12 муассисаи томактабӣ, 39 муассисаи тиббӣ, 30 иншооти фарҳанг, 7 варзишгоҳ, 41 толори варзиш, 28 майдончаи варзиш, 2 меҳмонхона, 130 километр роҳи мошингард, 17 пойгоҳи обкашӣ ва 3 маркази хизматрасонии техникаи кишоварзӣ сохта, ба истифода дода шудааст.

Қобили зикр аст, ки дар як муддати кӯтоҳ бо заҳмати аҳлонаи мардуми ноҳияи Мастчоҳ дар ҳудуди шаҳраку деҳот даҳҳо иншооти нав бо тарҳи миллӣ қомат афрохта, ба ин гӯшаи зебоманзари диёрамон ҳусни тоза бахшидаанд.

Имрӯз мавриди баҳрабардорӣ қарор гирифтани як қатор иншооти нави истеҳсоливу иҷтимоӣ, аз ҷумла майдони Парчами давлатӣ, чандин биноҳои маъмурӣ, Қасри фарҳанг бо 1000 ҷойи нишаст, Боғи фарҳангу фароғати “Тоҷикистон”, Қасри варзиш бо номи “Паҳлавони суғдӣ”, муассисаи таҳсилоти миёнаи умумӣ барои 1200 нафар хонанда, кӯдакистони хусусии “Ваҳдат” барои 160 кӯдак, фабрикаи парандапарварӣ ва корхонаи коркарди шир ҳамчун натиҷаи кори созандаи сокинони ноҳия аз он гувоҳӣ медиҳад, ки мардуми заҳматкаши ноҳия иқдомҳои созандаву бунёдкоронаи роҳбарияти мамлакатро ба шарафи 30 – солагии истиқлоли давлатӣ самимона дастгирӣ мекунанд.

Дар иншооту корхонаҳои навбунёди имрӯза барои сокинони ноҳия садҳо ҷойи нави корӣ муҳайё шудааст, ки ин кумаки ҷиддӣ ба ҳалли масъалаи муҳим – бо ҷойи корӣ ва шуғл таъмин намудани мардум мебошад.

Мастчоҳ зодгоҳи паҳлавонон ва варзишгарони номдори кишвар мебошад.

Дар натиҷаи амалӣ гардидани сиёсати давлати Тоҷикистон дар соҳаи ҷавонон ва варзиш дар даврони соҳибистиқлолӣ садҳо нафар устодони варзиш аз ҳисоби ҷавонони кишвар, аз ҷумла аз ноҳияи Мастчоҳ ба камол расида, Ватани азизи худро дар мусобиқаҳои гуногуни байналхалқиву минтақавӣ ба таври шоиста муаррифӣ кардаанд ва мардуми тоҷик бо чунин фарзандони ватандӯсти хеш ифтихор доранд.

Мо аз заҳмату талош ва муваффақиятҳои варзишгарони кишвар хуб огоҳ ҳастем ва аз онҳо пирӯзиву дастовардҳои навбатиро интизорем.

Бо мақсади дастгирии варзишгарон ва ҷавононе, ки дар ноҳияи Мастчоҳ низ мисли дигар шаҳру ноҳияҳои кишвар аксарияти аҳолиро ташкил медиҳанд, Ҳукумати мамлакат чанд сол пеш тасмим гирифт, ки дар ноҳия як варзишгоҳи замонавиро бунёд намояд.

Имрӯз мову шумо дар варзишгоҳи муосир, ки бо дарназардошти талаботи замони нав ва бо тамоми шароити зарурӣ барои 10 ҳазор нафар тамошобин бунёд шудааст, ҳузур дорем.

Иншооти мазкур аз ҷониби Дирексияи сохтмони иншооти ҳукуматии Дастгоҳи иҷроияи Президент ба маблағи 24 миллион сомонӣ бунёд гардидааст.

Итминон дорам, ки варзишгоҳи имрӯза ба оммавигардонии варзиш, рушди минбаъдаи варзиш ва тарбияи ҷисмонӣ на танҳо дар ноҳияи Мастчоҳ, балки дар вилояти Суғд такони ҷиддӣ мебахшад.

Бо истифода аз фурсат, ба ҳамаи коргарону сохтмончиёне, ки дар бунёди иншооти имрӯз ба истифода додашуда, аз ҷумла варзишгоҳ заҳмат кашида, барои ҷавонон ва мардуми ноҳияи Мастчоҳ чунин як варзишгоҳи замонавиро бо сифати баланд ва дар муҳлати кӯтоҳ бунёд кардаанд, инчунин, ба соҳибкорону шахсони саховатпеша барои иқдому ташаббусҳои ватандӯстонаашон изҳори сипос менамоям.

Бовар дорам, ки минбаъд тавассути истифодаи ин иншооти муосир  дар ҳаёти сокинони ноҳия, махсусан, наврасону ҷавонон варзиш, тарбияи ҷисмонӣ ва тарзи ҳаёти солим густариши бештар пайдо мекунад.

Ҳамчунин, хотирнишон месозам, ки мо бояд ба масъалаи рушди варзиш ва тарбияи ҷисмонӣ, тарғиби тарзи ҳаёти солим, махсусан, дар ин давраи ҳассос, ки хатари доман паҳн кардани бемории сироятии КОВИД-19 ҳанӯз аз байн нарафтааст, ҳамарӯза таваҷҷуҳ зоҳир намоем. Илова бар ин, зарур аст, ки ҳарчи зудтар омодагӣ ба зимистони дарпешистода, дар навбати аввал, омода кардани муассисаҳои иҷтимоӣ – мактабу кӯдакистонҳо, беморхонаҳо, дигар ташкилоту муассисаҳо ва дар ҳар як оила захира намудани маводи ғизоӣ вусъат бахшида шавад.

Ҳамдиёрони гиромӣ!

Истиқлоли давлатӣ дар охири садаи бистум дар ҳаёти халқи тоҷик оғози марҳалаи нави рушди ҳамаҷониба гардида, ба мардуми мо имконият фароҳам овард, ки дар ҳамаи ҷабҳаҳои ҳаёт ба дастовардҳои бесобиқаи таърихӣ ноил шаванд.

Аз ин лиҳоз, зарур аст, ки ҳар як фарди ватандӯсту ватанпараст ва худогоҳу худшинос бо ифтихору шукргузорӣ аз неъмати бебаҳои истиқлолу озодӣ, сулҳу оромӣ, суботи сиёсӣ ва ваҳдати миллӣ барои ҳифзи ин дастовардҳои таърихӣ ва таҳкими пояҳои давлатдории навини халқамон ҳамеша саъю талош намуда, дар пешрафту тараққиёт ва сарсабзиву ободии Ватани маҳбубамон – Тоҷикистон саҳми арзишманди худро гузорад.

Баргузории ин тантанаи бошукӯҳро низ, ки аз баракати истиқлолу озодии халқи азизамон мебошад ва ифтитоҳи варзишгоҳи муосиру муҷаҳҳазро бори дигар ба мардуми худогоҳу хештаншинос, баору номус ва ватандӯсти ноҳияи Мастчоҳ самимона табрик гуфта, ба ҳар яки шумо саломатӣ, некномиву осудаҳолӣ, саодати зиндагӣ ва барору комёбиҳо орзу менамоям.

Ҳамеша саломату сарбаланд бошед, ҳамдиёрони азиз!


Суханронии Пешвои миллат Эмомалӣ Раҳмон дар Қасри фарҳанги ноҳияи Мастчоҳи вилояти Суғд

( 0 Овоз )

14.09.2020, ноҳияи Мастчоҳ

Ҳозирини гиромӣ!

Дар оғози сухан ҳамаи шумо – намояндагони мардуми сарбаланду меҳмоннавоз, бонангу номус ва созандаву ободкори ноҳияи Мастчоҳро ба муносибати бисту нӯҳумин солгарди истиқлоли давлатии Ҷумҳурии Тоҷикистон, ҳамчунин, ҷашни фархундаи 5500-солагии Саразми бостонӣ, ки бо қарори ЮНЕСКО таҷлил гардида, нишонаи таърихи бостонии халқи тоҷик ба ҳисоб меравад, табрик мегӯям.

Воқеан истиқлолу озодӣ олитарин ва бузургтарин дастоварди мардуми тамаддунсозу фарҳангии мо буда, ҳамчун машъали фурӯзон роҳи моро ба сӯи фардои ободи Тоҷикистони азизамон равшану пурнур месозад.

Маҳз истиқлолу соҳибихтиёрӣ ба мову шумо имконият фароҳам овард, ки таърих, забон ва фарҳанги халқи худро ба таври шоиста қадрдонӣ кунем, анъанаву ойинҳои миллатамонро эҳё намоем, санаҳои таърихӣ ва шахсиятҳои бузурги халқамонро гиромӣ дошта, мероси бузурги маънавии гузаштагонро дар хизмати ҷомеа гузорем ва барои тарбияи наслҳои ояндасоз равона созем.

Ба шарофати истиқлолу озодӣ, ваҳдати миллӣ ва сулҳу субот мардуми мо дар шоҳроҳи созандагиву бунёдкорӣ қадамҳои устувор гузошта, имрӯз Ватани азизамонро хеле ободу пешрафта гардонидаанд ва ба хотири фардои боз ҳам ободтар сарҷамъона заҳмат кашида истодаанд.

Дар натиҷаи тадбирҳои андешидаи Ҳукумати мамлакат дар доираи татбиқи ҳадафҳои стратегӣ – расидан ба истиқлоли энергетикӣ, ҳифзи амнияти озуқаворӣ ва саноатикунонии босуръати кишвар, хусусан, дар зарфи солҳои охир рушди ҳамаи самтҳои ҳаёти ҷомеа таъмин ва сатҳу сифати зиндагии мардуми кишварамон хеле беҳтар гардид.

Рушди устувори иқтисоди миллӣ ба мо имкон фароҳам овард, ки ба пешрафти соҳаҳои иҷтимоиёт, аз ҷумла фарҳанг ва бунёду азнавсозии иншооти соҳа таваҷҷуҳи бештар зоҳир намоем.

Моҳи марти соли 2016 ҳангоми мулоқот бо сокинони ноҳияи Мастчоҳ, ки зимни сафари корӣ ба ноҳия баргузор гардида буд, хотирнишон карда будам, ки мардуми ноҳияи Мастчоҳ пас аз кӯч бастан ба мавзеи нав ва бунёд намудани диёри сабзу хуррам, дар навбати аввал, суннатҳои қадимаи аҷдодиро бо ифтихор ва садоқат ба ойинҳои ватандории худ ҳамроҳи хеш ба ин сарзамини навбунёд оварда, онҳоро то кунун идома медиҳанд.

Сокинони Мастчоҳ, дар ҳақиқат, меросбарони асили тамаддуну фарҳанги чандинҳазорсолаи ниёгонамон ҳастанд, ки суннату падидаҳои таърихии аҷдодамонро бо ойинҳои навини даврони соҳибистиқлолии кишварамон омезиш дода, бо ин роҳ дар ғанӣ гардонидани фарҳанги миллиамон ҳиссаи арзишманд мегузоранд.

Бо дарназардошти ҳамин масъала, Ҳукумати мамлакатро вазифадор карда будам, ки ба хотири рушди фарҳанги ғании аҷдодӣ, тайёр кардани ҳунармандони касбӣ ва муҳайё намудани шароити мусоид барои фаъолияти дастаҳои хунарӣ дар маркази ноҳия қасри замонавии фарҳангро бунёд карда, ба хизмати мардуми ноҳия ва аҳли санъату ҳунар супорад.

Ин қасри навбунёди фарҳанг, ки дорои ҳазор ҷойи нишаст мебошад ва аз тарафи Дирексияи сохтмони иншооти ҳукуматии Дастгоҳи иҷроияи Президенти мамлакат ба маблағи зиёда аз 30 миллион сомонӣ бунёд гардид, имрӯз бо тамоми таҷҳизоту шароити муосир ба истифода супорида шуд.

Бовар дорам, ки ба истифода додани ин Қасри фарҳанг дар доираи эълон шудани «Солҳои рушди деҳот, сайёҳӣ ва ҳунарҳои мардумӣ» ба пешрафти боз ҳам бештари санъату ҳунари мардуми Мастчоҳ ва ҳифзу гиромидошти суннатҳои қадима мусоидат хоҳад кард.

Ҳамчунин умед дорем, ки аз ҳисоби ҷавонону наврасони соҳибзавқи ноҳия ҳунармандони номвари мамлакат ба камол расида, ба мардуми шарифи Тоҷикистон хизмат хоҳанд кард.

Вобаста ба ин, таъкид месозам, ки аҳли фарҳанги ноҳия минбаъд низ дар тараннуми ғояҳои меҳанпарастӣ, худшиносии миллӣ, шукргузорӣ аз соҳибистиқлолии Ватан ва пойдории сулҳу ваҳдати миллӣ бояд пешсаф бошанд.

Ҳамчунин, театри халқии ноҳия, Ансамбли фолклорию этнографии «Нақш», гурӯҳи рақсии кӯдаконаи  «Садбарг», ки дар байни мардум маҳбубияти зиёд доранд, инчунин, дигар дастаҳои худфаъолияти бадеии мавҷуда бо истифода аз имкониятҳои беҳтарини муҳайёгардида бояд фаъолияти худро боз ҳам тақвият бахшида, дар баланд бардоштани ҳисси зебоипарастии мардум, махсусан, наврасону ҷавонон, тарғиби санъату фарҳанги асили миллӣ ва рушди ҳунарҳои мардумӣ саҳми сазовор гузоранд.

Шубҳае нест, ки шумо — мардуми бонангу номуси Мастчоҳи бостонӣ аз ободиву пешрафти диёри худ ва Тоҷикистони маҳбуб нерӯи нав гирифта, дар оянда низ барои рушду тараққиёти Ватани азизамон аҳлона ва содиқона заҳмат мекашед.

Дар охир, ҳамаи шумо, сокинони бонангу номус ва заҳматдӯсту ҳимматбаланди ноҳияи Мастчоҳро бори дигар ба муносибати 29 — солагии истиқлоли давлатӣ, 5500 — солагии Саразми бостонӣ ва ифтитоҳи Қасри зебои фарҳанг табрик гуфта, ба хонадони ҳар як сокини ноҳия сулҳу оромӣ, файзу баракат ва барору комёбӣ орзу менамоям.

Ҳамеша хонаободу сарбаланд бошед, ҳамдиёрони азиз!

Оғози сафари кории Сарвари давлат Эмомалӣ Раҳмон ба ноҳияи Мастчоҳ ва ифтитоҳи Корхонаи чӯҷабарории «Суғдиён-Свердловск»

( 0 Овоз )

14 сентябр дар идомаи сафари корӣ ба шаҳру ноҳияҳои вилояти Суғд Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Мастчоҳ ташриф оварданд.

Президенти мамлакат Эмомалӣ Раҳмон дар ноҳияи Зафаробод аз намоиши маҳсулоти кишоварзӣ, ҳунарҳои мардумӣ боздид намуданд ва ба маъракаи чиниши пахта дар хоҷагии ёрирасони ҶСК «Ҷасур» оғоз бахшиданд

( 0 Овоз )

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Зафарободи вилояти Суғд аз намоиши маҳсулоти кишоварзӣ ва ҳунарҳои мардумӣ дидан намуда, дар хоҷагии ёрирасони Ҷамъияти Саҳҳомии Кушодаи «Ҷасур» ба ҷамъоварии пахта оғоз бахшиданд.

Пешвои миллат Эмомалӣ Раҳмон дар ноҳияи Зафаробод ба фаъолияти марҳилаи аввали фермаи парандапарварии ҶСК «Ҷасур» оғози расмӣ бахшиданд

( 0 Овоз )

13 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Зафаробод ҳамчунин ба фаъолияти марҳилаи аввали фермаи парандапарварии Ҷамъияти саҳҳомии кушодаи «Ҷасур» дар шаҳраки Зафаробод оғози расмӣ бахшиданд.

ШУМО ДАР: Навиди Суғд