Хабарҳо
Зафаробод. Тавассути пойгоҳҳои обкашӣ 32 000 гектар замин обёрӣ мешавад - 22.07.2019 14:52
Машварати кории Раиси вилояти Суғд Раҷаббой Аҳмадзода - 22.07.2019 14:57
Суғд: Ба истиқболи 30-солагии Истиқлолияти Тоҷикистон озмуни вилоятии "Ҷамоати шаҳрак ва деҳоти беҳтарин" гузаронида мешавад - 22.07.2019 10:52
Таъсиси 6 ширкати сайёҳӣ ва 20 хатсайри нав дар Суғд - 22.07.2019 08:28
Барои беҳтарсозии ҳолати мелиоративии заминҳо 5,4 млн. сомонӣ равона гардид - 22.07.2019 08:26
Нашри китоби "Асосҳои давлат ва давлатдорӣ аз назари Пешвои миллат Эмомалӣ Раҳмон" - 22.07.2019 08:22
Нишасти 174-умини маҳфили “Ганҷи сухан” дар Ҷамоати деҳоти Ворух сурат гирифт - 19.07.2019 12:55
Пешвои миллат Эмомалӣ Раҳмон дар сатҳи роҳбарикунандаи сохторҳои низомӣ ва ҳифзи ҳукуқу тартибот тағйироти кадрӣ ба амал оварданд - 19.07.2019 12:51
Суғд: Бо харҷи беш аз 10 млн. сомонӣ 42 иншооти варзишӣ сохта ба истифода дода шуд - 19.07.2019 11:27
Дар нимсолаи якуми соли ҷорӣ бунёду азнавсозии беш аз 90 иншооти соҳаи тандурустӣ ба итмом расонида шуд - 19.07.2019 11:04

Навиди Суғд

Суғд: Ба истиқболи 30-солагии Истиқлолияти Тоҷикистон озмуни вилоятии "Ҷамоати шаҳрак ва деҳоти беҳтарин" гузаронида мешавад

( 0 Овоз )

Бахшида ба "Солҳои рушди деҳот, сайёҳӣ ва ҳунарҳои мардумӣ" ва ба истиқболи 30-солагии Истиқлолияти давлатии Ҷумҳурии Тоҷикистон давоми солҳои 2019-2021 дар вилояти Суғд озмуни вилоятии "Ҷамоати шаҳрак ва деҳоти беҳтарин" гузаронида мешавад. Дар ин бора қарори Раиси вилояти Суғд аз 16 июли соли 2019, №329 ба тасвиб расидааст.

Озмуни мазкур бо мақсади вусъат додани корҳои ободонӣ, бунёдкорию созандагӣ, ҷалби бештари сармояи хориҷию ватанӣ баҳри таъмини рушди иҷтимоию иқтисодӣ ва таъсиси ҷойҳои нави корӣ гузаронида шуда, дар он ҷамоатҳои шаҳраку деҳоти вилоят иштирок менамоянд. Барои муайян намудани ҷамоатҳои шаҳраку деҳоти беҳтарин нишондиҳандаҳои соҳаҳои маорифу тандурустӣ,фарҳанг, ҷавонон, варзиш, сайёҳӣ, хизматрасонии маишӣ, вазъи корҳои ободонӣ ва ғайраҳо ба назар гирифта хоҳад шуд.

Озмуни вилоятии "Ҷамоати шаҳрак ва деҳоти беҳтарин" дар ду марҳила сурат гирифта, дар марҳилаи якум ҷамоати шаҳраки беҳтарин ва ҷамоати деҳоти беҳтарин дар ҳудуди шаҳру ноҳия муайян карда мешавад. Дар марҳилаи дуюм ва вилоятии озмун танҳо ҷамоатҳои шаҳраку деҳот, ки дар марҳилаи аввал ғолиб дониста шудаанд, иштирок мекунанд.

Барои ғолибони озмуни вилоятии "Ҷамоати шаҳрак ва деҳоти беҳтарин" аз рӯи бахшҳои "Ҷамоати шаҳраки беҳтарин" ва "Ҷамоати деҳоти беҳтарин" аз 2000 сомонӣ то 6000 сомонӣ мукофотпулиҳо тақдим мешавад.

Хадамоти матбуоти
Раиси вилояти Суғд

Таъсиси 6 ширкати сайёҳӣ ва 20 хатсайри нав дар Суғд

( 0 Овоз )

Ҷиҳати иҷрои нақшаи чорабиниҳои марбут ба “Солҳои рушди деҳот, сайёҳӣ ва ҳунарҳои мардумӣ” дар нимсолаи якуми соли 2019 дар вилояти Суғд 6 ширкати сайёҳии нав таъсис ёфта, 20 хатсайри нави сайёҳӣ роҳандозӣ гардид.

Бо мақсади таъмини рушди соҳаи сайёҳӣ, муаррифии шоистаи имкониятҳои сайёҳӣ ва ҷалби гардишгарон ба мавзеъҳои истироҳативу сайёҳӣ, ҷалби сармоя ба инфрасохтори сайёҳӣ  тадбирҳои зарурӣ андешида шуда истодаанд. Ин аст, ки тавассути гузаргоҳҳои сарҳадии вилоят 363,3 ҳазор шаҳрвандони хориҷӣ, аз ҷумла ҳазорҳо нафар сайёҳон ба қаламрави вилоят ворид шудаанд.

Ёдовар бояд шуд, ки имрӯзҳо дар вилояти Суғд 32 ширкати сайёҳӣ  фаъолият мебаранд.

Хадамоти матбуоти
Раиси вилояти Суғд

Барои беҳтарсозии ҳолати мелиоративии заминҳо 5,4 млн. сомонӣ равона гардид

( 0 Овоз )

Беҳтарсозии ҳолати мелиоративии заминҳо таҳти таваҷҷуҳи роҳбарияти вилоят қарор дошта, дар нимсолаи якуми соли равон аз буҷети вилоят барои ба мавсими киштукор омода намудани пойгоҳҳои обкашӣ 5,4 млн. сомонӣ ҷудо карда шуд.

Аз ҷумла, барои таъмиру навсозии пойгоҳҳои обкашии шаҳру ноҳияҳои Зафаробод 1,3 млн. сомонӣ, Мастчоҳ 1 млн. сомонӣ, Ашт 900 ҳазор сомонӣ, Панҷакент 700 ҳазор сомонӣ, Кӯҳистони Мастчоҳ 700 ҳазор сомонӣ, Бобоҷон Ғафуров 400 ҳазор сомонӣ ва Ҷаббор Расулов 400 ҳазор сомонӣ маблағ равона карда шуд.

Ёдовар бояд шуд, ки барои ҳосили соли 2019 дар майдони 274,7 ҳазор гектар кишт гузаронида шуда, дурнамои кишти аксари зироатҳо таъмин гардидааст.

Хадамоти матбуоти
Раиси вилояти Суғд

Нашри китоби "Асосҳои давлат ва давлатдорӣ аз назари Пешвои миллат Эмомалӣ Раҳмон"

( 0 Овоз )

Дар шаҳри Хуҷанд китоби "Асосҳои давлат ва давлатдорӣ аз назари Пешвои миллат Эмомалӣ Раҳмон", ки ба қалами унвонҷӯи Донишгоҳи давлатии ҳуқуқ, бизнес ва сиёсати Тоҷикистон Исматҷон Ҷумъаев таалуқ дорад, ба нашр расид.

Китоби мазкур, ки монографияи илмии муҳаққиқи ҷавон маҳсуб меёбад, аз муқаддима ва ду боб иборат аст. Боби якуми китоб "Таҳкими Истиқлолияти миллӣ ва ҳокимияти давлатӣ" ва боби дуюм "Таълимоти Президенти Ҷумҳурии Тоҷикистон муҳтарам Эмомалӣ Раҳмон оид ба ҳуқуқ ва қонунгузорӣ" ном дорад.

Дар китоб муаллиф оид ба саҳми Президенти мамлакат муҳтарам Эмомалӣ Раҳмон дар барқарории сулҳу ваҳдат, эҳёи рукнҳои давлатдории миллӣ, рушди қонунгузории миллӣ дар марҳилаи аввали Истиқлолияти давлатӣ ва дигар масъалаҳои муҳимтарин фикру андешаҳои худро баён кардааст.

Хадамоти матбуоти
Раиси вилояти Суғд

Нишасти 174-умини маҳфили “Ганҷи сухан” дар Ҷамоати деҳоти Ворух сурат гирифт

( 0 Овоз )

Дар асоси нақшаи тасдиқнамудаи Мақомоти иҷроияи ҳокимияти давлатии вилояти Суғд нишасти 174-умини маҳфили илмиву адабии “Ганҷи сухан” дар Ҷамоати деҳоти Ворухи шаҳри Исфара баргузор шуд.

Роҳбари маҳфил адабиётшинос Саидумрон Саидов дар оғози маҳфил  таъкид кард, ки бахшида ба эълон шудани “Солҳои рушди деҳот, сайёҳӣ ва ҳунарҳои мардумӣ” маҳфили “Ганҷи сухан” нишастҳои худро дар деҳоти қаламрави вилоят баргузор карда истодааст.  Саидумрон Саидов ҳозиринро бо китобҳои наве, ки давоми ду моҳи охир интишор шуд ошно карда, як силсила адабиёти илмиву адабиро ба адибони Ворух эҳдо намуд.

Сипас, дар мавзӯи “Мақоми ҳавзаи Исфара дар пешрафти илму адаби муосири тоҷик” маърӯзаи номзади илмҳои филология Субҳон Аъзамзод шунида шуд. Адиби номвари тоҷик Додохони Эгамзод ва шоири хушқареҳа   Нарзуллои Азизиён доир ба фаъолияти маҳфили “Ганҷи Исфара” маълумот доданд. Додохони Эгамзод ба  ҳозирин оид ба китоби нави хеш “Нигина ва Мирмалик”- чакомаи ишқи пурафсуни таърихӣ сухан карда, як нусхаи китоби худро ба китобхонаи “Ганҷи сухан” эҳдо намуд.

Дар  идома адиб ва журналист Бобоҷон Наврӯз китоби нав - “Дорувор ба ҳар бемор”- ро, ки дар ҳамқаламӣ бо Абдумӯъмин Ҳалимов эҷод шудааст, муаррифӣ кард. Китоб ба ду забон тоҷикӣ ва русӣ интишор шуда, дар бораи табобати маризиҳо бо ёрии растаниҳои шифобахш нақл мекунад.

Дар маҳфил инчунин адиб ва журналисти номвар Корманди хизматнишондодаи Ҷумҳурӣ Муқим Абдураҳмонов, журналисти маъруф Судуриддин Маҳкамов, адибони номвар Субҳон Ёдгорӣ, Субҳон Бобохолов, муҳаққиқони тоҷик, профессор Аъзамҷон Азимов,  дотсент Шарифҷон Тоҷибоев ва Содирхон Умаров, омӯзгорони собиқадор Мирзоҳикмат Маҳкамов, Мукаррам Мелӣ, Бобохон Саидов,  Ховари Пӯлод, Ҷамолиддин Шоҳҳасанов, Меҳринисо Раҳматова, Замира Исматова, Расул Додхоҳи Раҳимиён, Бахтовари Усмон, Сайфуллохон Қорихонов, Абдувалии Худойдод, Абдуфайоз Олимӣ, Раҳмдили Турсунзод, Заҳҳобҷон Искандаров, Раҷабуллоҳ Комилов иштирок ва масъалаҳои гуногуни адабиро баррасӣ карданд.

Зикр шуд, ки дар густариши мактаби адабии Исфара ва Ворух маҳфили “Ганҷи Исфара” дар заминаи таҳлил ва интиқоди нигоштаҳои адибони ҷавон метавонад нақши бориз гузорад.

Дар анҷом ҳунарпешагони Ҷамоати деҳоти Ворух бо суруду оҳангҳои  дилнавоз ба маҳфил шукӯҳи тоза бахшиданд. Раиси Ҷамоати деҳоти Ворух Меҳринисо Раҳматова меҳмононро хайрамақдам гуфт ва аз баргузории як маҳфили пур аз меҳру муҳаббат сипосгузорӣ кард.

Хадамоти матбуоти
Раиси вилояти Суғд

ШУМО ДАР: Навиди Суғд